Accessibility links

بەغداد: هێزە کشاوەکانی ئەمەریکا لە سوریا مۆڵەتیان وەرنەگرتووە لە عێراق بمێننەوە


سوپای عێراق وتی ئەو هێزانەی ئەمەریکا کە لە سوریاوە هاتوونەتە نێو عێراقەوە مۆڵەتیان وەرنەگرتووە لە عێراقدا بمێننەوە تەنها مۆڵەتی ئەوەیان پێدراوە بێنە ناو عێراقەوە تاوەکو بتوانن بچنەوە دەرەوەی وڵاتەکە.

لەگەڵ ئەوەشدا وەزیری بەرگری ئەمەریکا مارک ئیسپەر وتی لەکۆتاییدا واشنتن ئامانجی ئەوەیە هێزە کشاوەکانی ئەمەریکا لە سوریا بگەڕێنێتەوە بۆ ئەمەریکا.

ئەم بەیاننامەیەی سوپای عێراق لەگەڵ بەیاننامەکەی وەزیری بەرگری ئەمەریکا مارک ئیسپەردا یەک ناگرێتەوە کە وتبووی واپێشبینی دەکرێت هەموو هێزە کشاوەکانی ئەمەریکا لە باکووری سوریا ڕەوانەی ڕۆژئاوای عێراق بکرێن بۆ بەردەوامبوونیان لە ڕووبەڕووبوونەوەی ڕێکخراوی داعش و پشتیوانیکردنی هەوڵەکانی بەرگریکردن لە عێراق.

سوپای عێراق لە بەیاننامەکەیدا ئاماژەی بەوەدا " هەموو هێزە کشاوەکانی ئەمەریکا لە سوریا مۆڵەتیان وەرگرتووە بچنە ناو هەرێمی کوردستانەوە تاوەکو لەوێ بتوانن بچنە دەرەوەی عێراق. هیچ مۆڵەتێک نیە بۆ مانەوەی ئەم هێزانە لەناو عێراقدا."

ئیسپەر وتی ئامانجی واشنتن مانەوەی هێزەکانی ئەمەریکا نیە لە عێراق.

مارک ئیسپەر لە لێدوانێکیدا لە بنکەی ئاسمانی ئەمیر سوڵتان لە نزیک شاری ڕیازی سعودیە وتی " ئامانجەکەمان مانەوەی هێزەکان نیە لە عێراق بۆ ماوەیەکی درێژ. ئامانجەکە ئەوەیە سەربازەکانمان بکشێنینەوە و بیانگەڕێنینەوە بۆ نیشتیمان."

سەرچاوە/ ڕۆیتەرز

XS
SM
MD
LG