Accessibility links

8 چەکدارى داعش له ‌کەرکوک خۆیان تەقاندەوە


ئێوارەى دوێنێ پێنجشەمە 8 چەکدارى لە نزیک ناحیەى ریاز ى رۆژئاواى کەرکوک خۆیان تەقاندەوە، کاتێک لەلایەن هێزە عێراقیەکانەوە گەمارۆ دران، هەروەها لەشەڕى نێوان چەکدارانى ئەو رێکخراوە و ژمارەیەک گوند نیشینى سنورى ناحیەى جەلەولاى دیالە، 7 کەس لەهەردوولا کوژران.

نازم کەهیە رێکخەرى پەیوەندیەکانى نێوان پێشمەرگە و حەشدى شەعبى، بەدەنگى ئەمەریکاى راگەیاند"حەشدى شەعبى هێزێکى زۆرى لە ناحیەى تازە خورماتوەوە بەرەو ناحیەى ریاز بردووە، لەوێ توشى رووبەروو بوونەوەى قورس بوون لەگەڵ داعشدا.

ناوبراو ئاماژەى بەوەشکرد، لەدەوروبەرى ناحیەى ریازى رۆژئاواى کەرکوک هێزە عێراقیەکان 40 چەکدارى داعشیان گەمارۆ دابوو، دواجار زۆربەى چەکدارەکان هەڵاتبوون، تەنها 8 چەکدارى خۆکوژیان مابوونەوە، وتى"8 چەکدارەکەى داعش خۆیان تەقاندەوە و لە ئەنجامدا ژمارەیەک چەکدارى حەشد برینداربوون."

لەلایەکى ترەوە دوو شەو لەمەوبەر چەکدارانى داعش هێرشیانکردە سەر گوندى شێخ باوەى باکورى ناحیەى جەلەولاى پارێزگاى دیالە ، دواى رووبەروو بوونەوەیەکى قورس لەگەڵ دانیشتوانى گوندەکەدا، شەڕەکە بە کوژرانى 4 چەکدارى داعش و برینداربوونى چەند چەکدارێک کۆتایى هات، هەروەها 3 کەسیش لەدانیشتنوانى گوندەکە کوژران و 8 کەسى تریش برینداربوون.

محەمەد سامان بەرێوەبەرى ئاسایشى جەلەولا، بەدەنگى ئەمەریکاى راگەیاند"ژمارەیەک چەکدارى داعش خۆیان گەیاندۆتە نێو دارستانەکانى باکورى جەلەولا."

وتیشى"ئەو چەکدارانەى لەنێو دارستانەکاندان داواى پارەیان لەگوندنیشینەکان کردووە، بەڵام ئەوان پێیان نەداون بۆیە هێرشیانکردۆتە سەریان و شەڕ روویداوە."

لەدواى هەڵبژاردنەکانى پەرلەمانى عێراقەوە، داعش جم و جۆڵێکى فراوانى لەناوچەکانى دەوروبەرى کەرکوک و پارێزگاى سەڵاحەدین و دیالە هەیە.

please wait

No media source currently available

0:00 0:01:55 0:00

XS
SM
MD
LG