نوێنەری ئێران لە نەتەوە یەکگرتووەکان پەیامێکی نارد بۆ سکرتێری گشتی نەتەوە یەکگرتووەکان ئەنتۆنیۆ گۆتێرێش و تیایدا وتی نەتەوە یەکگرتووەکان دەبێت لێپێچینەوە لەگەڵ ئەمەریکادا بکەن لەسەر ئەوەی دووبارە سزاکانی سەپاندۆتەوە بەسەر هەردوو کەرتی نەوت و دارایی ئێراندا کە ئەوەش پێشێلکردنی بڕیاری ئەنجومەنی ئاسایشی نێودەوڵەتیە.
نوێنەری ئێران لە نەتەوە یەکگرتووەکان غوڵام خۆشڕەو وتی " ڕەفتارە نابەرپرسیەکانی ئەمەریکا پێویستی بە وەڵامدانەوەیەکی بە کۆمەڵ هەیە لەلایەن کۆمەڵگەی نێودەوڵەتیەوە تاوەکو سەروەری یاسا بە بەرزی بمێنێتەوە و ڕێگە نەدرێت دیبلۆماسیەت لەناوببرێت." هەروەها داواشی کرد ئەمەریکا بە بەرپرسیار بزانرێت.
جێی ئاماژەیە لە ماوەی ڕابردوودا ئەمەریکا لەسەر داوای سەرۆکی وڵاتەکە دانۆڵد ترامپ سزاکانی سەپاندەوە بەسەر کەرتەکانی پیشەسازی نەوت و دارایی ئێراندا، ئەمەش دوای ئەوەی ئەمەریکا لە ڕێکەوتنامەی ناوەکیی ئێران کشایەوە کە تیایدا بەپێی ڕێکەوتنەکە سزاکانی سەر ئێران لابرابوون و لەبەرامبەریشدا ئێران دەبوو چالاکییە ناوەکییەکانی سنووردار بکات.
هەروەها لەلای خۆیەوە وەزیری دەرەوەی ئێران محەمەد جەواد زەریف وتی سزا نوێیەکانی ئەمەریکا بەپێچەوانەوە دەشكێتەوە بەسەر ئەمەریکادا نەک بەسەر کۆماری ئیسلامی ئێراندا و زیاتر گۆشەگیری دەکات.
زەریف وتی لە تۆڕی کۆمەڵایەتی تویتەر نوسیویەتی " ئەمڕۆ ئەمەریکا تەحەدای گەورەترین دادگای کردووە لە نەتەوە یەکگرتووەکان و ئەنجومەنی ئاسایشی نێودەوڵەتیدا، بەوەی کە سزاکانی سەپاندەوە بەسەر ئێراندا، بەڵام ئەم هەنگاوەی ئەمەریکا ئەنجامی پێچەوانەی دەبێت چونکە ئەوە ئەمەریکایە گۆشەگیر بووە نەک ئێران."
سەرچاوە/ ڕۆیتەرز