عەلی ئەکبەر ویلایەتی ڕاوێژکاری ڕابەری باڵای ئێران ئایەتوڵا عەلی خامنەئی لەمیانەی سەردانەکەیدا بۆ مۆسکۆ پێشوازیی لە پەیوەندییە ستراتیژییەکانی نێوان وڵاتەکەیی و ڕوسیای کرد، ئەم سەردانەش لە هەڵمەتێکی سیاسیی ئێراندا دێت لەکاتێکدا خۆی ئامادە دەکات بۆ ڕووبەڕووبوونەوەی سزاکانی ئەمەریکا.
ویلایەتی ڕەخنەی لە سەرۆکی ئەمەریکا دانۆڵد ترامپ گرت و وتی " ڕەفتارە بڕوا پێنەکراوەکانی وای کردووە پەیوەندییە توندوتۆڵەکانی نێوان تاران و مۆسکۆ گرنگتر ببێت."
جێی ئاماژەیە لە مانگی پێنجدا ئەمەریکا لە ڕێکەوتنە ناوەکییەکەی نێوان ئێران و زلهێزەکانی جیهان کشایەوە و ئەمەریکا دەڵێت واشنتن هەموو سزاکان دەسەپێنێتەوە بەسەر ئێراندا و بە وڵاتانی دیکەشی ڕاگەیاندووە لە چواری مانگی یانزەوە هەموو هاوردەکانی نەوتی ئێرانی ڕابگرن ئەگەر نا ڕووبەڕووی ڕێوشوێنی دارایی ئەمەریکا دەبنەوە.
دەزگای هەواڵی تەڵەبە لە زاری ویلایەتییەوە ڕایگەیاند " پەیوەندییەکانی نێوان ئێران و ڕوسیا پەیوەندییەکی ستراتیژین، لەم ساڵانەی دواییدا پەیوەندییە دوو قۆڵییەکان و هەرێمییەکانی نێوان ئەو دوو وڵاتە فراوانتر بوون."
وتیشی پەیامی ڕابەری باڵای ئێران و سەرۆکی ئێران حەسەن ڕۆحانی دەگەیەنێت بە پوتن و باس لە هەڵوێستێکی جیهانی زۆر هەستیار دەکەن.
ویلایەتی ئاماژەی بە هاریکاری نێوان ڕوسیا و ئێران کرد لە سوریادا، لەکاتێکدا ئەو دوو وڵاتە پشتیوانی لە سەرۆکی سوریا بەشار ئەسەد دەکەن لە جەنگی ناوخۆی سوریادا کە زیاتر لە حەوت ساڵە بەردەوامە.
ویلایەتی وتی " پەیوەندییە ستراتیژییە ماوە درێژەکان لەگەڵ ڕوسیادا تاکە شتە کە دەتوانێت ئەم هاریکارییە بەردەوامی پێبدات."
سەرچاوە/ ڕۆیتەرز