دەزگای هەواڵی ئێرانی تەسنیم لە زاری سکرتێری ئەنجومەنی ئاسایشی نیشتیمانی ئێران عەلی شەمخانییەوە بڵاویکردەوە تاران وەڵامی هەر ڕێوشوێنێکی دوژمنکارییانە دەداتەوە و " سەردەمی لێبدە و ڕابکە " نەماوە.
دوای ئەوەی سەرۆکی ئەمەریکا دانۆڵد ترامپ لە ڕێکەوتنە ناوەکییەکەی ئێران کشایەوە، گرژیی پەیوەندییەکانی نێوان تاران و واشنتن زیادی کرد و ئەمەریکا سزاکانی سەپاندەوە بەسەر ئێراندا.
دەزگاکە لە زاری شەمخانیەوە بڵاویکردەوە " سەردەمی لێبدە و ڕابکە لە جیهاندا نەماوە و هەر ڕێوشوێنێکی دوژمنکارانە دژی وڵاتەکەمان، تاران بە دە هێندە وەڵام دەداتەوە. ئێمە لە تواناماندا هەیە لە هەموو بوارەکاندا خۆمان بپارێزین."
وتیشی " کاردانەوەی ئەم دواییەی ئێران لە کوردستانی عێراق تەنها نموونەیەکە لەسەر ئەوەی تاران وەڵامی هەر هەڕەشەیەک دەداتەوە."
سەرچاوە/ ڕۆیتەرز