ڕاوێژکاری ئەڵمانیا ئۆلاف شۆڵز ئاماژەی بەوەدا کراوەیە سەبارەت بە ڕەوانەکردنی هێزی زیاتری ئەڵمانیا بۆ لیتوانیا، ئەوەش بەمەبەستی پتەوکردنی وڵاتانی ڕۆژهەڵاتی ئەوروپای ئەندام لە هاوپەیمانێتی ناتۆدا و وەکو وەڵامێکیش بۆ زیادبوونی هێزەکانی ڕووسیا لەسەر سنوورەکانی ئۆکرانیا.
هەفتەی ڕابردوو سەرۆکی ئەمەریکا جۆو بایدن فەرمانیکرد 3000 سەربازی ئەمەریکی ڕەوانەی دوو وڵاتی هاوپەیمانێتی ناتۆ بکرێن لە ڕۆژهەڵاتی ئەوروپا، ئەوانیش پۆڵەندا و ڕۆمانیا بوون. پێشتریش بەشێک لە هێزەکانی ئەمەریکا گەیشتنە بنکەیەکی سەربازیی لە پۆڵەندا، لەنزیک سنووری ئۆکرانیا.
شۆڵز بەر لە گەشتەکەی بۆ ئەمەریکا و کۆبوونەوەی لەگەڵ سەرۆکی ئەمەریکا جۆو بایدندا، وتی " ئامادەین هەموو ئەو شتانە بکەین کە پێویستن بۆ پتەوکردنی گروپە شەڕکەرەکان کە لە لیتوانیادا بوونیان هەیە و ئەڵمانیا ڕابەرایەتیان دەکات."
وتیشی ئەو بابەتە لەگەڵ ڕابەرانی سێ وڵاتەکەی باڵتیکدا باس دەکات کە وابڕیارە ڕۆژی پێنجشەممەی داهاتوو سەردانی بەرلین بکەن و لەگەڵ شۆڵزدا کۆببنەوە.
بەڵام دووبارە ڕەوانەکردنی چەکی بۆ ئۆکرانیا ڕەت کردەوە و وتی سیاسەتی ئەڵمانیا ئەوەیە و چەک ڕەوانەی ئەو ناوچانە ناکات کە ململانێیان تێدایە.
هاوپەیمانێتی ناتۆ یەکە سەربازییە نێودەوڵەتیەکانی ڕەوانەی پۆڵەندا و لیتوانیا و لاتیڤیا و ئێستۆنیا کردووە و نزیکەی 5,000 سەرباز دەبن، ئەوەش وەکو وەڵامێک بۆ لەخۆگرتنی نیمچە دورگەی کرێمیای ئۆکرانیا لە ساڵی 2014 دا لەلایەن ڕووسیاوە.
شۆڵز وتی بەرەوپێشچوونێکی بینیوە لە قەیرانەکانی نێوان ڕۆژئاوا و ڕووسیادا، ئەوەش بەهۆی زیادبوونی گفتوگۆکانی نێوان ئەمەریکا و ڕووسیاوە بووە، یاخود بەهۆی گفتوگۆکانی چوار وڵاتەکەی ڕێکەوتنی نۆرماندییەوە بووە کە هەریەک لە ئەڵمانیا و ڕووسیا و فەڕەنسا بەڕیتانیا لەخۆدەگرێت، ئامانج لەو ڕێکەوتنەش ڕاگرتنی ململانێکانی نێوان هێزەکانی ئۆکرانیا و جیاخوازەکانی ڕۆژهەڵاتی ئۆکرانیایە کە ڕووسیا پشتیوانیان لێدەکات.
سەرچاوە/ ڕۆیتەرز