وەزیری دەرەوەی فەڕەنسا خۆی بەدوورگرت لەوەڵامدانەوەی کۆمەڵێک پرسیار سەبارەت بەوەی کە ئایا پێویستە لەسەر وڵاتەکەی فرۆشتنی چەک بوەستێنێت بە سعودیە و ئیماڕات کە لە یەمەن بەکاردەهێنرێن و وتیشی ئێران چەکی زۆری هەیە لەو وڵاتەدا.
سعودیە ڕابەرایەتی هاوپەیمانێتییەک دەکات کە لە ساڵی 2015 دا پێکهێنرا بۆ بەرەنگاربوونەوەی حوسیەکانی هاوپەیمانی ئێران کە ئێستا زۆربەی باکووری یەمەن و سەنعای پایتەختی وڵاتەکەیان لەژێر دەستدایە، لە جەنگێکدا کە بۆتە هۆی کوژرانی دەیان هەزاران هاوڵاتی مەدەنی و زیاتر لە سێ ملیۆن خەڵکی بێ ماڵ و حاڵ کردووە.
حکومەتی فەڕەنسا لە سەردەمی سەرۆک ئیمانوێل ماکرۆندا لەلایەن گروپەکانی مافی مرۆڤەوە ڕووبەڕووی ڕەخنەیەکی زۆر بۆتەوە بەهۆی ئەوەی کە پشتیوانی سعودیە دەکات و ڕێگەی پێدەدات ئەو چەکانەی کە بە سعودیەی دەفرۆشێت بەکاربهێنرێن لە ئەرکە سەربازییەکاندا لە یەمەن.
کاتێک سەبارەت بە هۆکاری بەردەوامبوونی فەڕەنسا لە فرۆشتنی چەک بە سعودیە و ئیماڕات پرسیاری لێکرا، وەزیری دەرەوەی فەڕەنسا ژان ئیڤ لۆدغیان خۆی بەدوورگرت لە بابەتەکە و وتی کاری سەرەکیمان دۆزینەوەی چارەسەرێکی سیاسییە بۆ جەنگی یەمەن.
لۆدغیان لەبەردەم لیژنەی پەیوەندییەکانی دەرەوەی پەرلەماندا وتی " ئێمە بەڕاستی نیگەرانین سەبارەت بە ڕەوشەکەی یەمەن."
وتیشی " ڕاستە چەکی سعودی هەیە، بەڵام باوەڕ دەکەن چەکی ئێرانیش هەیە لەوێ، چەکێکی زۆری ئێرانی."
ئێرانیش ڕەتی دەکاتەوە چەکی دابێت بە حوسییەکانی یەمەن.
جێی ئاماژەیە سعودیە و ئیماڕات یەکێکن لەو وڵاتانەی کە چەکێکی زۆری فەڕەنسی دەکڕن لەوانەش تانک و ئوتومبێلی زریپۆش و تەقەمەنی و تۆپهاوێژ. ئیماڕاتیش فڕۆکەی جەنگی فەڕەنسی دەکڕێت.
سەرچاوە/ ڕۆیتەرز