ئۆفیسی سەرۆک وەزیری فەڕەنسا ئێدوارد فیلیپ وتی حکومەت تاوتوێی لابردنی ڕێوشوێنە تەندروستیە بەپەلەکان دەکات لە 10 ی مانگی حەوتدا کە بۆ ڕووبەڕووبوونەوەی پەتای کۆرۆنا سەپێندرابوون.
وتیشی 10 ی مانگی حەوت بژاردەیەکە لەنێو کۆمەڵێک بژاردەی دیکەدا کە لە ئێستادا تاوتوێ دەکر‌ێن.
دوای ئەوەی ژمارەی توشبووان بە ڤایرۆسی کۆرۆنا لە فەڕەنسا کەمبۆوە، وڵاتەکە زۆرێک لە ڕێوشوێنە تەندروستیە بەپەلەکانی لابرد و قۆناغ بە قۆناغ بازاڕ و دوکان و کۆمەڵگە گەشتیارییەکانی کردەوە.
سەرەڕای ئەمەش هێشتا حکومەت داوا لە هاوڵاتیان دەکات لە کاتی چوونە دەرەوەیاندا کەمامە ببەستن و پابەندی ڕێکارە تەندروستیەکان بن و قەرەباڵغی دروست نەکەن.
سەرچاوە/ ڕۆیتەرز