بەرپرسی سیاسەتی دەرەوەی یەکێتی ئەوروپا فیدریکا موگیرینی وتی یەکێتی ئەوروپا ناتوانێت گرەنتی یاسایی و دارایی بدات بە ئێران بەڵام جددیە سەبارەت بە دۆزینەوەی ڕێگەیەک بۆ بەردەوامبوونی وەبەرهێنانەکان و لە هەفتەکانی داهاتوودا ڕێوشوێنەکان پێشنیار دەکرێن لەم بارەیەوە.
دوای کۆبوونەوەکەی نێوان وەزیرانی دەرەوەی ئێران و بەڕیتانیا و فەڕەنسا و ئەڵمانیادا، موگیرینی وتی بەرپرسە بەشدارەکانی ڕێکەوتنەکە شارەزایانیان ڕاسپاردووە بۆ پاراستنی کارەکانی ئەوروپا لە ئێران. هەفتەی داهاتووش کۆبوونەوەیەک لە ڤییەنا لە سەر ئاستی نوێنەرانی وەزیرانی دەرەوە ئەنجام دەدرێت.
وتیشی " ئێمە کاردەکەین بۆ دۆزینەوەی چارەسەرێکی کرداری، ئێمە باس لە کۆمەڵێک چارەسەر دەکەین بۆ پاراستنی ڕێکەوتنەکە." وتیشی ئەو ڕێوشوێنانە هەوڵدەدەن ڕێگە بە ئێران بدەن بەردەوام بێت لە هەناردەکردنی نەوت و ڕێگە دەدات بە بانکە ئەوروپییەکان تاوەکو لە ئێران کار بکەن.
جێی ئاماژەیە ڕۆژی سێشەممە وەزیرانی دەرەوەی وڵاتانی ئێران و ئەڵمانیا و فەڕەنسا و بەڕیتانیا کۆبوونەوەیەکیان ئەنجامدا بۆ گفتوگۆکردن لەسەر چۆنێتی ڕزگارکردنی ڕێکەوتنە ناوەکییەکەی ئێران دوای ئەوەی ئەمەریکا لە ڕێکەوتنەکە کشایەوە.
وەزیری دەرەوەی ئێران محەمەد جەواد زەریف وتی " ئێمە لەسەر ئاڕاستەیەکی ڕاستین، زۆر شت هەیە لەسەرمان لە هەفتەکانی داهاتوودا دەبێت ئەنجامیان بدەین."
سەرچاوە/ ڕۆیتەرز