Accessibility links

سەرۆکی فیلیپین دەڵێت هەتا بکرێت بەباشی مامەڵە لەگەڵ سەرۆک ترامپدا دەکەم


سەرۆکی فیلیپین ڕۆدریگۆ دۆتێرتی وتی لە کۆبوونەوەکەی مانگی داهاتوویدا لەگەڵ سەرۆک ترامپدا هەتا بکرێت بە باشی مامەڵەی لەگەڵدا دەکات و باس لە ئاسایشی هەرێمەکە و شەڕی مانێلا دژ بە ماددە هۆشبەرەکان دەکەن.

سەرۆکی ئەمەریکا دانۆڵد ترامپ لەماوەی نێوان 13 و 14 مانگی یانزەدا گەشت دەکات بۆ ئاسیا لەمیانەی زیادبوونی گرژییەکان سەبارەت بە بەرنامە ناوەکیی و موشەکییەکەی کۆریای باکووردا.

مانێلا کۆتا شوێن دەبێت لە گەشتەکەی سەرۆک ترامپدا کە هەریەک لە وڵاتانی ژاپۆن و کۆریای باشوور و چین و ڤیێتنام دەگرێتەوە و ئامادەی کۆبوونەوەی لوتکەی سەرکردەکانی وڵاتانی باشووری ڕۆژهەڵاتی ئاسیا دەبێت.

سەرۆک ترامپ لەگەڵ دۆتێرتیدا لە مانێلا کۆدەبێتەوە بەڵام بەشداری کۆبوونەوەی سەرکردەکان و حکومەتەکانی چین و کۆریای باشوور و ژاپۆن و هیندستان و ئوستڕاڵیا و نیوزلەندا ناکات کە لە مانێلا بەڕێوەدەچێت.

لە کۆنگرەیەکی ڕۆژنامەوانیدا پێش ئەوەی گەشت بکات بۆ ژاپۆن بۆ کۆبوونەوە لەگەڵ سەرۆک وەزیری ژاپۆن شینزۆ ئابی، سەرۆکی فیلیپین دۆتێرتی وتی " گفتوگۆکان سەبارەت بە تیرۆر و هاریکاری نێوان دوو وڵاتەکە و جەنگ دژی ماددە هۆشبەرەکان دەبێت، بەباشیش مامەڵەی لەگەڵدا دەکەم سەبارەت بەم بابەتانە."

وتیشی " هەتاکو بکرێت بە باشترین شێوە مامەڵە لەگەڵ سەرۆک ترامپدا دەکەم و وەکوو سەرکردەیەکی گرنگ پێشوازی لێدەکەم، هەروەها گوێشی لێدەگرم."

نوێنەری مانێلا لە نەتەوە یەکگرتووەکان سۆنگ کیم هەفتەی ڕابردوو وتی واچاوەڕوان دەکرێت دوو سەرۆکەکە باس لە مافەکانی مرۆڤ و حوکمی یاسا بکەن.

سەرچاوە/ ڕۆیتەرز

XS
SM
MD
LG