بەرپرسانی بێلاڕوس ئاماژەیان بەوەدا دوای خۆپیشاندانەکانی ڕۆژی یەکشەممەی ئۆپۆزسیۆن دژی سەرۆکی وڵاتەکە ئالیکساندەر لوکاشینکۆ، زیاتر لە 700 کەس دەستگیرکراون.
وتەبێژی وەزارەتی ناوخۆی بێلاڕوس ئۆڵگا چیمودانۆڤا لە بەیاننامەیەکدا وتی " زیاتر لە 700 کەس دەستگیرکراون، ئەوەش بەهۆی پێشێلکردنی یاساکانەوە."
ڕێکخراوی " ڤیاسنا " ی بێلاڕوس کە ڕێکخراوێکە بەرگری لە مافەکانی مرۆڤ دەکات وتی لە خۆپیشاندانەکانی ڕۆژی یەکشەممەدا لانی کەم 1200 کەس دەستگیرکراون.
ڕابەری ئۆپۆزسیۆنی بێلاڕوس سڤیتلانا تیخانۆڤسکایا ڕایگەیاند لەگەڵ نوێنەرانی یەکێتی ئەوروپادا کۆبۆتەوە و داوای کردووە سزای ئابووری زیاتر بسەپێندرێت بەسەر کۆمپانیا گشتیەکانی بێلاڕوس و بانکەکانی سەر بە حکومەتی ئەو وڵاتەدا.
سەرچاوە/ فرانس پرێس