هەوڵى هەندێک لە سوننه نشینەکانی عێراق بۆ بە هەرێمکردنى پارێزگاکانیان چڕتر دەبێتەوە و سەرۆک وەزیرانى عیراقیش لە هەوڵدایە بەرپرسانى پارێزگاى سەڵاحەدین لەو بڕیارەیان پەشیمان بکاتەوە.
بۆ ئەو مەبەستەش نورى مالیکى لەگەڵ پارێزگار و جێگرەکەى و ئەندامانى ئەنجومەنى ئەو پارێزگایە کۆبۆوه و بڕیاره سەردانى ئەو شارە بکات بۆ تاووتوێکردنى هەمان پرس.
دکتۆر ئەمین عەزیز جێگرى پارێزگارى سەڵاحەدین لە لێدوانێکیدا بۆ دەنگى ئەمهریکا لە بارەى ئەوەى ئەو بڕیارەیان لە چیـیەوە سەرچاوەى گرت دەڵێت شارەکەمان لە هەموو ڕوویەکەوە فەرامۆش کراوە و بڕیارەکانى بەرپرسانى بەغداش دیکتاتۆریانە بوون.
لە بارەى ئەوەى ئەم بڕیارەى ئەنجومەنى پارێزگاى سەڵاحەدین ههتا چەند پەیوەندى بە دوو لێدوانەکەى ئوسامە نوجەیفی سەرۆکى پەرلەمانى عیراق ههبووه که پـێشـتر لە واشنتن و لەندەن دابوونی و تیایاندا باسى لە پێکهێنانى هەرێمێکى سوننهنشین کردبوو، دکتۆر ئەمین گوتی هیچ پەیوەندی بەو لێدوانەوە نیـیە چونکە پارێزگاى سەڵاحەدین نە تەنها عەرەبى سوننه، بەڵکو کورد و شیعە و تورکمانیش تێدا دەژین.
دهتوانن گوێبیسـتی دهقی ڕاپـۆرتهكه بن له ڕێـگهی كلیـكـكردنی ئهو فایله دهنـگیـیانهی سهرهوهی دهسته چهپ، ماوهكهی 3:53 خولهكه.