ژمارەی قوربانیه‌كان له ئاكامی بومه‌له‌رزە به‌هێز و شه‌پۆله‌كانی سونامی گه‌یشته 54 هه‌زار كه‌س كه پێدەچێت ئه‌م ژمارەیه به‌رەو زیادی بڕوات.
له جاكارتا، وەزارەتی ته‌ندروستی ئه‌مڕۆ ڕایگه‌یاند كه 27 هه‌زار كه‌س كوژراون و ژمارەكه گه‌لێك زیادی كردووە له 19 هه‌زار كوژراوی ڕاپۆرتێكی كه له‌وەو پێشتر بڵاوكرابۆوە.
كاربه‌دەستانی فریاگوزاری نه‌ته‌وە یه‌كگرتووەكان دەڵێن ڕەنگه ژمارەكه له‌وە زیاتر بێت چونكه دەستیان ناگاته ناوچه‌كانی سومترە و دروگه‌كانی مێڵدڤێس له ئۆقیانوسی هندیدا.
كارەساتی سونامی هه‌زارەها دێهاتی ئه‌و ناوچانه‌ی وێران كردووە و لانه‌ی له ملیۆنه‌ها خه‌ڵكی شێواندووە. كارمه‌ندانی فریاگوزاری ئه‌و هه‌رێمه گیریان خواردوە به دوای دۆزینه‌وەی ڕزگاربووەكان و ترسی بڵاوبونه‌وەی نه‌خۆشیه‌كانی مه‌لاریا و كۆلێرایان هه‌یه.
هاوكات دانیشتوان به كۆمه‌ڵ مردووەكانیان دەنێژن و ڕێكخراوی منداڵانی جیهانی سه‌ر به نه‌ته‌وە یه‌كگرتووەكان دەڵێن سێ یه‌كی كوژراوەكان منداڵن.
ژمارەی كوژراوەكانیش له سیریلانكا گه‌یشتۆته 18 هه‌زار و له هندستان 8،500 . كارەساتی سونامی زیانێكی زۆری به سه‌رانسه‌ری تایلاندیش گه‌یاندووە و له بورماش ژمارەیه‌ك له خه‌ڵكی گیانیان له دەستداوە. به هه‌مان شێوە زیان له به‌نگلادش و مالیزیا و ته‌نانه‌ت له ته‌نزانیا و سۆماڵیش كه‌وتووە كه به هه‌زارەها كیلۆمه‌تر له ناوەندی بومه‌له‌رزەكه‌وە دوور بوون.