وەزارەتی دەرەوەی ووڵاته یه‌كگرتووەكانی ئه‌مه‌ریكا و نه‌ته‌وە یه‌كگرتووەكان دەڵێن ئه‌وان به شێوەیه‌كی جدی نیگه‌رانن به‌رامبه‌ر به‌و ڕاپۆرتانه‌ی كه ڕادەگه‌یه‌نن چاودێریكردنی ئاسایشی ڕێبه‌ری دیموكراتخوازی بورمی دەستگیركراو ئاونگ سان سووچی نه‌هێڵراوە.
له ڕۆژی پێنج شه‌ممه‌دا، وەزارەتی دەرەوە گوتویانه ئه‌وان خه‌می ڕەوشی براوەی خه‌ڵاتی نۆبڵیان هه‌یه. سكرتێری گشتی نه‌ته‌وە یه‌كگرتووەكانیش كۆفی ئه‌نان هه‌مان هه‌ڵوێستی نیشانداو بانگه‌شه‌ی دەسه‌ڵاتدارانی بورمی كرد كه بیریان بێت ئه‌وان له سه‌لامه‌تی خانم ئاونگ سان سوچی به‌رپرسن.
ڕێكخراوێكی بنكه له ئه‌مه‌ریكا به ناوی هه‌ڵمه‌ته‌كانی ئه‌مه‌ریكا بۆ بورما داوای له ئه‌ندامه‌كانی كردووە په‌یوەندی به باڵیۆزی بورمی له واشنتۆن بكهن و داوای ئازادكردنی ئه‌و خانمه دەستگیر كراوە بكهن.
ئه‌ندامانی پارتی ئۆپۆسزیۆنی بورمیش له ڕۆژی پێنج شه‌ممه‌دا، گوتی حكومه‌ت ژمارەی ئه‌و سه‌ردانانه‌ی كه‌م كردۆته‌وە كه پێشتر به پزیشكه‌كانی خانم سان سوچی ڕێگه درابوو، هه‌روەها بارودۆخی ئاسایشیشی پارێزراو نیه.
جێی باسه، خانم ئاونگ سان سووچی بۆ ماوەی زیاتر له ساڵێكه له ماڵه‌كه‌ی خۆیدا دەست به سه‌رە.