ل هه‌ڤلێرێ دیده‌ڤان دبێژن یه‌ك ژ بومبه هه‌لگرێت خوهكوژ ل هۆڵه‌كا كۆمبونا پارتی یا دیموكراتیا كوردستانێ خوه په‌قاند و یێ دی ل بنگه‌ها یه‌كه‌تیا نیشتیمانیا كوردستانی خوه په‌قاند.
گه‌له‌ك كورد ل هه‌ردوو بنگه‌ها خرڤه‌بون بۆ پیرۆزكرنا جه‌ژنا قوربانێ. كاربده‌ستا هوژداری دابوو ل سه‌ر زێده‌بوونا هێرشان د وه‌ختێ جه‌ژنێ دا.
ڕۆژا شه‌مبی ل باژارێ موسل بكێمی 9 پۆلیسێت عێراقی و خه‌لكێ مه‌ده‌نی هاتینه كوشتن ده‌مێ ئۆتۆمبێله‌كا بومبه‌كری پێش بنگه‌هه‌كێ پۆلیسا په‌قی و 45 كه‌سێت دی بریندار بوون.
كاربده‌ستێت ئه‌مریكی دبێژن سێ سه‌ربازێت ئه‌مریكی هاتینه كوشتن ده‌مێ كاروانه‌ك ناڤبه‌را تكریتێ و كه‌ركوكێ دچۆ و بۆمبه‌ك ل سه‌ر جادێ په‌قی. دیسان هه‌ر ل ڕۆژا شه‌مبی دیده‌ڤان دبێژن ب كێمی ڤه پێنج كه‌س هاتنه كوشتن ب په‌قینا بومبه‌كێ ل ڕه‌نده‌كه‌كا به‌غدا.
ئه‌ڤ زێده گاڤیه د وه‌خته‌كێ دا تێته كرن كو جێگرێ وه‌زیرێ به‌ره‌ڤانیا ئه‌مریكی پاول والفوێتز ب سه‌ردان چۆیه عێراقێ. ڕێزدار والفوێتز گۆت ئه‌و دخازیت بنێریته ده‌ست و دارێ پاراستنێ و ته‌ناهیێ و دێ چه‌وا هێزێت ئه‌مریكی ل عێراقێ هێنه گوهۆڕین.
جێگرێ وه‌زیرێ به‌ره‌ڤانیێ ژ ئه‌ڵمانیا چۆیه عێراقێ ئو لوێرێ دگه‌ل سه‌ربازێت ئه‌مریكی كۆمبو كو بڕیاره بچنه عێراقێ سه‌ره‌دانا وی نه هاتبو ڕاگه‌هاندن ژبه‌ر ئه‌گه‌رێت پاراستنێ. ڕێزدار والفوێتز وه‌سا تێته دیتن كو نه‌خشه‌كێشێ سه‌ره‌كیێ شه‌رێ ب ڕێبه‌ریا ئه‌مریكا دژی عێراقێ یه دبێژت دیار بونا خه‌له‌تیا دناڤ پێ زانین و ئاگه‌هیاندا ل سه‌ر چه‌كێت عێراقێ مه‌عنا وێ ئه‌و نینه كو شه‌ڕێ دژی عێراقێ پێتڤی نه‌بو. ئه‌مریكا و بریتانیا دگۆت ژبه‌ر كو عێراقێ چه‌كێت وێرانكه‌ر هه‌نه ئه‌گه‌را سه‌ره‌كی بو بۆ شه‌ری.
لێ هه‌تا نوكه چ ژوان چه‌كا نه‌‌هاتینه ڤه‌دیتن ئو لێڤه‌كۆلێ به‌رێ یێ چه‌كا یێ ئه‌مریكی ده‌یڤید كه‌ی گوتیه كو ئه‌و باوه‌ر ناكه‌ت عێراقێ ئه‌و چه‌ك هه‌ین به‌ری شه‌ری. ڕێزدار كه‌ی دبێژێت كو ئاژانسێت ئاگه‌هیان دخه‌له‌ت بوون.