له كاتێـكدا فڕۆكه جه‌نگیـیه‌كانی ئیسرائیلی ئامانجه گومان‌لێـكراوه‌كانی حه‌ماسـیان له ناوچه‌ی فه‌له‌سـتینـیـیه‌كان بۆ ڕۆژی شه‌شه‌مین بۆردومان كردووه تانك و هێزه‌كانیان له نزیك سـنووری غه‌ززه كۆبوونه‌ته‌وه.
هاوكات به‌رپـرسـانی ئیسرائیلی له ڕۆژی پـێـنجشه‌ممه‌دا سه‌باره‌ت به ڕه‌وانه‌كردنی هێزی زیاتر بۆ ئه‌ودیو سـنووره‌كانه‌وه وتووێژده‌كه‌ن.
جێی وتنه موشه‌كی ئاسـمانی و ده‌ریایی‌یه‌كانی ئیسرائیل باڵه‌خانه‌كانی حكومه‌تی حه‌ماس و تونێـله‌كانی قاچاخچێتی و بنكه‌كانی موشـه‌ك‌هاویشـتنیان وێران كردووه.
سه‌رچاوه فه‌له‌سـتینیـیه‌كان گوتوویانه له ئاكامی یه‌كێـك له هێرشـه ئاسـمانیـیه‌كان نزار ڕه‌یانی ڕێبه‌ری باڵای سـیاسی حه‌ماس و چوار كه‌سی دیكه كه یه‌كێكیان ئه‌ندامی خێزانه‌كه‌یه‌تی كوژراون.
له ئاكامی هێرشه ئاسـمانیـیه‌كان به لایه‌نی كه‌مه‌وه 400 فه‌له‌سـتینی كوژراون و نزیكه‌ی 2 هه‌زاری تر برینداربوون. نه‌ته‌وه یه‌كگرتووه‌كان ده‌ڵێت نزیكه‌ی یه‌ك له‌سه‌ر چواری كوژراوه‌كان خه‌ڵـكانی مه‌ده‌نین.
هێرشه موشـه‌كیـیه‌كانی حه‌ماسیش بۆته مایه‌ی گیان له‌ده‌سـتدانی 4 ئیسرائیلی له ڕۆژی شه‌ممه‌وه. ڕێبه‌رانی جیهانی نیگه‌رانن سه‌باره‌ت به ڕه‌وشی مرۆیی له غه‌ززه‌دا و هه‌وڵه دیپـلۆماتیـیه‌كانیان چڕتر كردۆته‌وه بۆ كۆتایی‌هێنان به‌و توندوتیژیـیه. هه‌رچه‌ندێـكه له ڕۆژی چوارشه‌ممه‌دا ئه‌نجومه‌نی ئاسایشی نه‌ته‌وه یه‌كگرتووه‌كان پـێشـنیارێـكی عه‌ره‌بی ڕه‌تكرده‌وه بۆ ده‌ركردنی بڕیارێـك داوای ئاگربه‌ستێـكی ده‌سـتبه‌جێی ده‌كرد.
