Accessibility links

له‌ ئێواره‌خوانێـكدا له‌ خۆرئاوای به‌غدا خۆكوژێـك 25 كه‌س ده‌كوژێت


به‌رپـرسـانی عێراقی ده‌ڵێن هێرشـبه‌رێـك له‌ ئێواره‌خوانێـك له‌ خۆرئاوای به‌غدا خۆی ته‌قانده‌وه‌ و له‌ ئاكامدا 25 كه‌س كوژران و 32 كه‌سی دیكه‌ برینداربوون.

به‌رپـرسـان ده‌ڵێن هێرشـبه‌ره‌كه‌ له‌ ماڵی شێخێـكی خۆجێی خۆی ته‌قانده‌وه‌ كه‌ ئاهه‌نگی ده‌گێڕا به‌بۆنه‌ی ئازادكردنی كوڕه‌كه‌ی له‌ به‌ندیخانه‌یه‌كی ئه‌مه‌ریكایـیه‌وه‌.

میوانه‌كان بریتیبوون له‌ ئه‌ندامانی ئه‌نجومه‌نی سه‌حوه‌ی سـوننه‌كان و كۆمه‌ڵه‌ی میلیشـیاكانی لایه‌نگری ئه‌مه‌ریكا كه‌ له‌ دژ ئه‌لقاعیده‌ شه‌ڕ ده‌كه‌ن.

له‌ لایه‌كی دیكه‌وه‌ هه‌ر ڕۆژی یه‌كشه‌ممه‌ له‌ ئاكامی ته‌قینه‌وه‌ی دوو بۆمب له‌ به‌غدا به‌ ئامانجی هێزه‌كانی ئاسایشی عێراقی 4 كه‌س كوژران. له‌ پارێزگای دیاله‌ش به‌هۆی ته‌قینه‌وه‌ی بۆمبێـكی سه‌ر ڕێـگا چوار سه‌ربازی عێراقی له‌ شـاری به‌له‌دڕووز كوژران، له‌ كاتێـكدا چه‌كداران دوو كارمه‌ندی پـۆلیسـیان له‌ باقوبه‌ كوشـتووه‌.

بابه‌تی په‌یوه‌ندیدار

XS
SM
MD
LG