Accessibility links

به‌هۆی ته‌قینه‌وه‌ی بۆمبێـك لووله‌یه‌كی نه‌وت له‌ به‌سـره‌ زیانی پـێـده‌گات


كاربه‌ده‌سـتانی عێراق ده‌ڵێن ڕۆژی پـێنجشه‌ممه‌ بۆمبێـك به‌ لووله‌یه‌كی نه‌وتدا ته‌قیوه‌ته‌وه‌ له‌ شـاری به‌سـره‌ی باشوری وڵات، ئه‌و شـاره‌ی كه‌وا بۆ سێ ڕۆژه‌ له‌وێ هێزه‌كانی حكومه‌تی عێراق شه‌ڕی میلیشـیا شیعه‌كان ده‌كه‌ن.

كاربه‌ده‌سـتان ناڵێن كێ به‌رپـرسه‌ له‌و هێرشه‌ی كراوه‌ته‌ سه‌ر ئه‌و لووله‌ نه‌وته‌. هه‌روه‌ها ڕوونیش نیـیه‌ ئایا ئه‌و زیانه‌ی به‌و هێڵه‌ كه‌وتووه‌ زۆر كار ده‌كاته‌ سه‌ر ناردنی نه‌وتی خاو یان نا.

هاوكات گه‌واهیده‌ران له‌ به‌سره‌وه‌ ڕایانگه‌یاند ڕۆژی پـێـنجشه‌ممه‌ش شه‌ڕی قورس له‌ شـاره‌كه‌دا ڕوویداوه‌. كاربه‌ده‌سـتان ده‌ڵێن به‌ لایه‌نی كه‌م 40 كه‌س كوژراون له‌وه‌تای له‌ ڕۆژی سێشه‌ممه‌وه‌ هێزه‌كانی حكومه‌ت ده‌سـتیان به‌ كرده‌وه‌یه‌كی له‌شـكری له‌دژی میلیشـیا شیعه‌كان كردووه‌.

جێی ئاماژه‌ پـێـكردنه‌ سه‌رۆك وه‌زیری عێراق نوری ئه‌لمالیكی دوا مۆڵه‌تێـكی ده‌ركردووه‌ و تیایدا فه‌رمانی به‌ چه‌كداره‌ شیعه‌كان داوه‌ تا ڕۆژی هه‌ینی چه‌كه‌كانیان دابنێن و ئه‌گه‌ر نا ئه‌وا به‌ره‌و ڕووی ئاكامه‌كانی ده‌بنه‌وه‌.

له‌ لایه‌كی تره‌وه‌ ڕۆكێت و خومپاره‌ گیراوه‌ته‌ ناوچه‌ی سه‌وزی به‌غدا، ئه‌وه‌ش ڕۆژێـك پاش ئه‌وه‌ی چوارشه‌ممه‌ هێرشـێـكی هاوشێوه‌ كرایه‌ سه‌ر ئه‌و ناوچه‌یه‌ و تیایدا 3 ئه‌مریكایی برینداربوون.

هه‌روه‌ها كاربه‌ده‌سـتان ده‌ڵێن سه‌رله‌نوێ له‌ گه‌ڕه‌كی سه‌دری به‌غداش شه‌ڕ هه‌ڵـگیرسـاوه‌ته‌وه‌ و له‌وێش هه‌ر چوارشه‌ممه‌ به‌ لایه‌نی كه‌م 14 كه‌س كوژراون و 100 كه‌سی تریش برینداربوون.

له‌ واشـنتنیش ده‌مڕاسـتی كۆشـكی سـپی تۆنی فراتۆ گوتی به‌ڕێوه‌به‌رایه‌تی سه‌رۆك بوش ده‌سـتخۆشی له‌ به‌ڕێز ئه‌لمالیكی ده‌كات له‌سه‌ر ئه‌و ڕێوشوێنانه‌ی له‌ شـاری به‌سره‌ گرتوویه‌تیـیه‌به‌ر، ده‌شڵێت حكومه‌تی عێراق ده‌یه‌وێت ئاسایشی خۆی كۆنتڕۆڵ بكات. تۆنی فراتۆ گوتیشی كۆشـكی سـپـی پـێـشبینی ده‌كات ئێران كۆمه‌كی هه‌ندێ یاخیبووانی هه‌رێمه‌كه‌ بكات.

ئه‌م پـێـكدادانانه‌ی به‌سره‌ ڕه‌نگه‌ بـبنه‌ مایه‌ی كۆتایی هێنان به‌و ئاگربه‌سـته‌ حه‌وت مانگ درێژخایه‌نه‌ی كه‌ موقته‌دا ئه‌لسه‌در له‌‌ سـاڵی ڕابردوودا ڕایگه‌یاند.

سه‌باره‌ت به‌ هه‌واڵه‌كانی تری عێراق په‌یامنێری ده‌نگی ئه‌مریكا سـروه‌ عه‌بدولواحد ڕاپـۆرتێـكی له‌ به‌غداوه‌ ناردووه‌ و ده‌توانن گوێبیسـتی بن له‌ ڕێـگه‌ی كلیـكـكردنی ئه‌و فایله‌ ده‌نـگیـیه‌ی سه‌ره‌وه‌، ماوه‌كه‌ی 1:54 خوله‌كه‌.

XS
SM
MD
LG