Accessibility links

كاربه‌ده‌سـتێـكی ئێرانی ده‌ڵێت به‌ریتانیـیه‌ ده‌ستگیركراوه‌كان دانیان به‌ نایاسایی چوونیان بۆ ناو ئاوی ئێراندا ناوه‌


كۆماندارێـكی له‌شـكری ئێرانی گوتی 15 ئه‌ندامی هێزی ده‌ریایی به‌ریتانی له‌ زیندانی ئێراندا دانیان به‌وه‌دا ناوه‌ به‌ نایاسایی چوونه‌ته‌ ناو ئاوی ئێرانه‌وه‌.

ڕۆژی شه‌ممه‌ له‌ وتووێـژێـكدا له‌گه‌ڵ میدیای ئێرانی ژه‌نه‌ڕاڵ عه‌لی ڕه‌زا ئه‌فشار گوتی ئه‌و ده‌ستـگیركراوه‌ به‌ریتانیانه‌ له‌ لێـكۆڵینه‌وه‌كاندا كۆك بوون له‌سه‌ر ئه‌وه‌ی له‌ ده‌می ده‌سـتگیركردنه‌كه‌یاندا له‌ ناو ئاوی ئێراندا بوون.

ژه‌نه‌ڕاڵ ڕه‌زا گوتیشی لـێـكۆڵینه‌وه‌كان به‌رده‌وامن و هه‌ر پانزه‌یان له‌ ڕه‌وشێـكی ته‌ندروستی باشـدان.

شـایانی ئاماژه‌ پـێـكردنه‌ هێزی ده‌ریایی ئێران ئه‌و تاقمه‌یان ڕۆژی هه‌ینی ده‌سـتگیركرد له‌و ده‌مه‌ی پـشـكنینێـكی ئاسایی‌یان بۆ كه‌شـتیـیه‌كی بازرگانی له‌ نێو ده‌ریای شه‌ط ئه‌لعه‌ره‌بدا ده‌كرد.

كاربه‌ده‌سـتانی ئێرانی ده‌ڵێن به‌ڵـگه‌ هه‌یه‌ كه‌ ده‌یسه‌لمێنێت ئه‌و تاقمه‌ ده‌یانزانی ئه‌وان له‌ نێو ئاوی ئێراندان، وه‌ به‌ كردارێـكی دوژمنكارانه‌ی داده‌نێن.

به‌ریتانیاش سووره‌ له‌سه‌ر ئه‌وه‌ی ئه‌و 15 سه‌ربازه‌ی هێزی ده‌ریایـیه‌ی پـشـكنینی ئاسایی‌یان ده‌كرد له‌ دژی كاری قاجاخچێـتی له‌ نێو ئاوی عێراقدا، وه‌ داواشی كردووه‌ ده‌ستبه‌جێ ئازاد بكرێن.

XS
SM
MD
LG