Accessibility links

خۆپـیشـاندانی ناڕه‌زایی له‌ دژی كرێملن له‌ مۆسـكۆ سـازده‌كرێت


به‌مه‌به‌سـتی نیشـاندانی ناڕه‌زایی له‌ دژی زیادبوونی ده‌سه‌ڵاتی سـته‌مكاری كرێملن نزیكه‌ی 2 هه‌زار كه‌س ڕۆژی شه‌ممه‌ له‌ دژی ڤلادیمیر پوتین سه‌رۆكی ڕوسـیا له‌ ناوجه‌رگه‌ی مۆسـكۆی پایته‌ختدا كۆبوونه‌وه‌.

هێزه‌كانی پـۆلیس و له‌شـكری دژه‌ ئاژاوه‌ كه‌ ژماره‌یان زۆر له‌ خۆپـیشـانده‌ران زیاتر بوو ئابڵۆقه‌ی ئه‌و گۆڕه‌پانه‌یان دا كه‌ خۆپـیشـاندانه‌كه‌ی تیادا سـازدرا و ڕێـگه‌ی هاتووچۆیان له‌ شـه‌قامی سه‌ره‌كی ناو مۆسـكۆدا بڕی.

هاوكات ماشـێنی سه‌ربازی و ئاو ڕشـێنـكه‌ر له‌ ناوچه‌كه‌دا له‌ ئاماده‌ باشیدا بوون و فڕۆكه‌ی هه‌لیـكۆپـته‌ر به‌سه‌ر خۆپـیشـانده‌راندا ده‌سـوڕایه‌وه‌.

خۆپـیشـاندانه‌ ناڕه‌زایـیه‌كه‌ له‌ لایه‌ن هاوبه‌ندی ئۆپـۆزیـسـیۆن ڕێـكخرا. هاوپه‌یمانیـیه‌تیـیه‌كه‌ له‌ به‌ره‌ی سـڤیلی یه‌كگرتوو و پارتی به‌لشـیڤی نیشـتیمانی و هه‌روه‌ها یه‌كێتی دیموكراتی گه‌لی ڕوسی پـێـكهاتبوو.

ڕێـكخه‌رانی خۆپـیشـاندانه‌كه‌ ده‌ڵـێن هێزه‌كانی پـۆلیس چه‌ند خۆپـیـشـانده‌رێـكیان ده‌سـتگیر كردووه‌ و هه‌روه‌ها ڕێـگه‌یان به‌ چه‌ندین كه‌س نه‌داوه‌ تا بۆ به‌شـداریـكردنیان له‌ خۆپـیشـاندانه‌كه‌دا به‌ره‌و مۆسـكۆ بچن.

ئه‌لیكسـانده‌ر هاتۆڤ سه‌رنووسه‌ری بڵاوكراوه‌ی به‌ره‌ی سـڤیلی یه‌كگرتوو گوتی ڕێـگه‌گرتن له‌ هاوڵاتیـیان و هه‌روه‌ها گرتنه‌ به‌ری ڕێوشـوێنی ئاسایشی تۆكمه‌، ئه‌و ڕاسـتیـیه‌ ده‌رده‌خات كه‌ حكومه‌تی مۆسـكۆ له‌ هاوڵاتیـیانی خۆی ده‌ترسـێت.

هه‌روه‌ها پاڵه‌وانی پـێشـووی جیهانی یاری شه‌تڕه‌نج گاری كاسـپارۆڤ كه‌ سه‌رۆكی به‌ره‌ی سـڤیلی یه‌كگرتووه‌ قسه‌ی بۆ جه‌ماوه‌ره‌كه‌ كرد.

XS
SM
MD
LG