ئێران ڕۆژنامه‌یه‌كی ڕه‌سمی حكومه‌ت داده‌خات

حكومه‌تی ئێرانی ڕۆژنامه‌یه‌كی ڕه‌سمی داخستووه‌ له‌سه‌ر بڵاوكردنه‌وه‌ی کاریکاتێرێـك له‌ ڕۆژی هه‌ینی ڕابوردوو.

ته‌له‌فیزیۆنی حكومی ئێران ڕۆژی سـێشه‌ممه‌ له‌ زاری داواكاری گشـتی سه‌عید مورته‌زه‌وی بڵاوی كرده‌وه‌ وێنه‌كێشی کاریکاتێره‌كه‌ و یه‌ك له‌ ده‌سته‌ی سه‌رنووسه‌ران ده‌سـتگیر كراون.

کاریکاتێـره‌كه‌ سـووكایه‌تی به‌ ئازه‌ریـیه‌كان كردووه‌، تیایدا وێنه‌ی ئازه‌ریـیه‌ك كێشراوه‌ وه‌ك سـیسركێـك كه‌ به‌ ئازه‌ری قسه‌ ده‌كات.

کاریکاتێره‌كه‌ بووه‌ مایه‌ی سه‌رهه‌ڵدانی خۆپـشاندان و گێره‌شـێوێنی له‌ شاری ته‌ورێز له‌ باكوری ڕۆژئاوای ئێران.

ڕۆژی دووشه‌ممه‌، ئازه‌ریـیه‌كان كه‌وتنه‌ به‌رده‌بارانی باڵه‌خانه‌ حكومیـیه‌كان. پـۆلیسیش گازی فرمێسـك ڕێژی به‌كارهێناوه‌ تا بڵاوه‌ به‌ جه‌ماوه‌ره‌كه‌ بكات.

شایانی باسه‌ نزیكه‌ی له‌سه‌دا 25 ی دانیشتوانی ئێران ئازه‌رین.