وه‌زیرانی ده‌ره‌وه‌ی یه‌كێتی ئه‌وروپا له برۆكسـلی پایته‌ختی به‌لجیكا كۆده‌بنه‌وه به
مه‌به‌ستی ئاماده‌كردنی ده‌سته‌یه‌ك له هانده‌ری بازرگانی و سیاسی بۆ ئێران به ئومێدی ئه‌وه‌ی قایلی بكه‌ن سه‌باره‌ت به به‌رنامه ناوه‌كیـیه‌كه‌ی به‌كرده‌وه هاوكاری نه‌ته‌وه یه‌كـگرتووه‌كان بكات.
دیبلۆماته ئه‌وروپـیـیه‌كان ده‌ڵێن ئه‌وان ده‌یانه‌وێت ئه‌و ده‌سته هانده‌ره له كۆبونه‌وه‌ی ڕۆژی هه‌ینی له له‌نده‌ن پـێـشكه‌شی ئه‌ندامانی هه‌میـشه‌یی ئه‌نجومه‌نی ئاسایشی نه‌ته‌وه یه‌كـگرتووه‌كان و ئه‌ڵمانیای بكه‌ن.
به‌ڕێوبه‌ری ڕێبازی ده‌ره‌وه‌ی یه‌كێتی ئه‌وروپا خافێر سۆلانا گوتی ئه‌و هانده‌رانه‌ی پـێـشـنیار ده‌كرێت گه‌ڵێـك باشن و زۆر بابه‌تی له‌خۆگرتووه، په‌یوه‌ندیـیان به ته‌كنه‌لۆژیای ناوه‌كیـیه‌وه هه‌یه و هه‌روه‌ها ئابوری و ڕه‌نـگه مه‌سه‌له‌ی ئاسایشیش بگرێته‌وه.
وڵاته یه‌كگرتووه‌كانی ئه‌مریكا و هاوپه‌یمانه ئه‌وروپـیـیه‌كانی به‌و ئاڕاسـته‌یه پاڵ ده‌نێن كه بڕێارێـك له ئه‌نجومه‌نی ئاسایش ده‌ربچێت تیایدا ئێران ناچار بكات چالاكیـیه‌كانی پـیـتاندنی یۆرانیۆم ڕابگرێت.
شایه‌نی باسه وڵاته ڕۆژئاوایـیه‌كان ده‌ڵێن ئه‌وان پـێـیان وایه تاران توێژینه‌وه ناوه‌كیـیه‌كانی بۆ مه‌به‌ستی دروسـتكردنی چه‌كی ناوه‌كی به‌كار ده‌هێنێت. تارانیش ده‌ڵێت به‌رنامه ناوه‌كیـیه‌كه‌ی بۆ مه‌به‌ستی به‌رهه‌مهێنانی وزه‌ی كاره‌بایه.
یه‌كشه‌ممه، سه‌رۆكی ئێرانی مه‌حمود ئه‌حمه‌دی نه‌ژاد گوتی تاران هه‌رچ پـێشـنیارێـكی ئه‌وروپـیـیه‌كان ڕه‌تده‌كاته‌وه ئه‌گه‌ر داوای لێ بكرێت كۆتایی به دروسـتكردنی سووته‌مه‌نی ناوه‌كی بهێنێت.
هه‌ر یه‌كشه‌ممه، وڵاته یه‌كگرتووه‌كانی ئه‌مریكا ئه‌و داخوازیانه‌ی بۆ وتووێژی ڕاسته‌وخۆ له‌گه‌ڵ ئێراندا ڕه‌تكرده‌وه، گوتیشی نه‌ته‌وه یه‌كگرتووه‌كان باشترین جێـگایه بۆ ئه‌و جۆره وتووێژانه.