پریتی پاتێل، وەزیری ناوخۆی بەریتانیا، ڕۆژی هەینی ڕەزامەندی دەربڕی لەسەر ڕادەستکردنەوەی جولیان ئاسانجی دامەزرێنەری ویکیلیکس بۆ ئەمەریکا تا ڕووبەڕووی تۆمەتەکان ببێتەوە، ئەمەش داستانە یاساییەکەی کە ماوەیەکی زۆرە درێژەی کێشاوە لە ئەنجامێک نزیکدەبێتەوە.
ئاسانج لەلایەن دەسەڵاتدارانی ئەمەریکاوە بە 18 تۆمەت داواکراوە، لە نێویاندا تۆمەتی سیخوڕیکردن، کە پەیوەندی هەیە بە بڵاوکردنەوەی بەڵگەنامەی ئێجگار زۆری تۆمارە نهێنییە سەربازییەکانی ئەمەریکا و ڕێبازی دیپلۆماسی ئەمەریکا لەلایەن ویکیلیکسەوە کە واشنتۆن دەڵێت ژیانی خەڵکیان خستۆتە مەترسییەوە.
لایەنگرانی دەڵێن ئەو پاڵەوانێکی دژە دامەزراوەیە و بووەتە قوربانی چونکە هەڵەکانی ئەمەریکای لە ململانێکانی ئەفغانستان و عێراقدا ئاشکرا کردووە و لێپێچینەوە لەسەر ئەو هێرشێکی سیاسییە بۆ سەر ڕۆژنامەگەری و ئازادی ڕادەربڕین.
ستێلای هاوسەری ئاماژەی بەوەکردووە کە ئاسانج تانە لە بڕیارەکە دەدات دوای ئەوەی وەزارەتی ناوخۆی ئەمەریکا ڕایگەیاند کە ڕەزامەندی لەسەر ڕادەستکردنەوەی پەسەندکراوە.
وەزارەتی ناوخۆی بەریتانیا لە بەیاننامەیەکدا ڕایگەیاندووە کە "لەم دۆسیەیەدا دادگاکانی بەریتانیا بۆیان دەرنەکەوتووە کە ڕادەستکردنەوەی بەڕێز ئاسانج ستەمکارانە و نادادپەروەرانە یان خراپ بەکارهێنانی پرۆسەی دادگاییکردنەکەیە".
دەشڵیت "هەروەها بۆیان دەرکەوتووە کە ڕادەستکردنەوە لەگەڵ مافە مرۆییەکانیدا ناکۆک نیە، لەوانەش مافی دادگاییکردنی دادپەروەرانە و ئازادی ڕادەربڕین، لە کاتێکدا لە ئەمەریکا مامەڵەی گونجاوی لەگەڵ دەکرێت، لەوانە لایەنی تەندروستیشی."
لە بنەڕەتدا دادوەرێکی بەریتانی بڕیاریدا کە نابێت ئاسانج ڕادەست بکرێت و گوتی تەندروستی حاڵەتی دەروونی ئەو بە ڕادەیەکە؛ مانای ئەوەیە ئەگەر سزا بدرێت و لە زیندانێکی توندوتۆڵی ئاسایشدا ڕابگیرێت، ئەوا مەترسی ئەوەی لێدەکرێت خۆی بکوژێت. "
بەڵام ئەم تانە یاساییە هەڵوەشایەوە دوای ئەوەی ئەمەریکا پاکێجێکی دڵنیایی دا، لە نێویاندا بەڵێنیان دا کە دەتوانرێت بگوازرێتەوە بۆ ئوسترالیا بۆ تێپەڕاندنی هەر سزایەک.
بڕیارەکەی پاتێل بە مانای کۆتایهاتنی شەڕی یاسایی ئاسانجە کە لە دایکبووی ئوسترالیایە و زیاتر لە دە ساڵە ئەم کێشمەکێشی دادگاییکردنە بەردەوامە و دەتوانێت چەندین مانگی دیکەش بەردەوام بێت.
دەتوانێت لە دادگای باڵای لەندەن تانە بدات کە دەبێت ڕەزامەندی خۆی بدات بۆ بەرەنگاربوونەوە. لە کۆتاییدا دەتوانێت هەوڵ بدات کەیسەکەی بباتە دادگای باڵای بەریتانیا. بەڵام ئەگەر تانەکەی ڕەتکرایەوە، دەبێت ئاسانج لە ماوەی 28 ڕۆژدا ڕادەستبکرێتەوە.
ستێلا هاوسەری ئاسانج دەڵێت "ئەمڕۆ ڕۆژە تاریکەکەی ئازادی ڕۆژنامەگەری و دیموکراسیە لە بەریتانیا. "ڕێگای ئازادی جولیان درێژ و پڕ هەڵبەز و نشێوە. ئەمڕۆ کۆتایی شەڕەکە نییە. تەنها سەرەتای شەڕێکی یاسایی نوێیە. "
سەرچاوە: ڕۆیتەرز