Accessibility links

خەسرەو گۆران: هەرێم پارێزگایەک نیە لە عێراق تا بێ پرس خەڵک ببرێت و بکرێتە وەزیر


ئەندامێکی سەرکردایەتی پارتی دیموکراتی کوردستان، جەخت لەسەر ئەوەدەکاتەوە هەرێمی کوردستان پارێزگایەک نیە لەعێراق، تا محەمەد عەلاوی بێ ڕاوێژ لەگەڵ سەرکردایەتی حیزبەکان، وەزیر لەنێو هەرێمدا بۆ وەزارەتەکان دەست نیشان بکات.

لە گفتووگۆیەکی لەگەڵ دەنگی ئەمەریکا خەسرەو گۆران ئەندامی سەرکردایەتی پارتی، دەڵێت"کەسی راسپێردراو بۆ پێکهێنانی حکومەت، دەبێت ڕاوێژ لەگەڵ سەرکردایەتی حیزبەکان بکات."

دەشڵێت"کورد شەریکە لە عێراقدا، بۆیە دەبێت شەراکەت و هاوسەنگی بپارێزرێت، ناکرێت کەسێک لە هەرێمەوە ببرێت و بکرێتە وەزیر، بڵێن: ئەمە شەریکایەتیە، خۆ تەها جەزراوی لەحکومەتی بەعسدا وەزیر بوو، بەڵام چی بۆ کورد کرد؟."

سەبارەت بەهەڵوێستی حیزبە کوردیەکان، لەحاڵەتی دانەنانی کاندیدی حیزبە کوردیەکان لە وەزارەتەکاندا، خەسرەو گۆران وتی"ئێمە زیاتر لە 60 پەرلەمانتارمان هەیە، ئەوکات هەڵوێستمان دەبێت."

هەفتەی رابردوو، مەسعود بارزانی لەگەڵ ژمارەیەک لە پارێزگاکانی عێراق دا کۆبوویەوە، سەبارەت بە هۆکاری کۆبوونەوەکە و رێکخەرەکەی، سەرکردەکەی پارتی وتی"نێوان سەرۆک بارزانی و پارێزگارەکانی عێراق بەشیعە و سونەوە خۆشە، ئێمە کێشەمان لەگەڵ خەڵکی عێراق نیە، بەڵکو کێشەمان لەگەڵ حکومەتەکاندا هەیە، کەدەستوریان جێبەجی نەکردووە."

وتیشی"کێ رێکخەری کۆبوونەوەکە بووە؟ دیارە خۆیان کۆبوونەوەکەیان پێخۆش بووە، بارەگای بارزانیش دەیان ڕاوێژکاری شارەزایان هەیە."

کۆبوونەوەی بارزانی و پارێزگارەکانی عێراق ، لەکاتێکدایە بەپێی زانیاریەکانی دەنگی ئەمەریکا، وڵاتانی ئیقلیمی و هەندێک لایەنی شیعی، پارتی بە جوڵێنەری پرسی هەرێمی سونەکان تۆمەتبار دەکەن، لەمبارەیەوە خەسرەو گۆران جەختیکردەوە"ئێمە ناتوانین لەبری سونەکان بڕیار بدەین، ئەوان خۆیان ئازادن چۆن بڕیار دەدەن، گەر داوای هەرێم بکەن، پەیوەندی بەخۆیانەوە هەیە و دەستور ئەو مافەی پێداون."

روونیشیکردەوە جم و جۆڵی سونەکان لەدەرەوەی عێراق بووە نەک لەهەولێر، جم و جۆڵەکانیشیان بە ئاگاداری ئەمەریکا و وڵاتانی عەرەبی بووە، ئەگینا بوونیان لەهەولێر و سلێمانی هۆکارەکەی ئاوارەبوونیانە، وتی"ئیمارات و سعودیە ناکۆکیان لەگەڵ ئێران هەیە، پێیانخۆشە سونەکانی عێراق ڕۆڵیان هەبێت."

لەکۆتایی قسەکانیدا بۆ دەنگی ئەمەریکا، خەسرەو گۆران ئەندامی سەرکردایەتی پارتی، باسی لە هەوڵی لایەنە شیعیەکان بۆ دەرکردنی هێزەکانی ئەمەریکا لەعێراق کرد، وتی"پەیوەندی هەرێم لەگەڵ ئەمەریکاو وڵاتانی هاوپەیمان بەهێزە، کورد لەگەڵ بڕیارەکەی پەرلەمانی عێراق دا نەبوو بۆ دەرکردنی هێزەکانی ئەمەریکا."

please wait

No media source currently available

0:00 0:08:29 0:00


XS
SM
MD
LG