بەرپرسانی ئەفغانی وتیان چەکدارانی تاڵیبان هێرشێکی گەورەیان کردۆتە سەر هەرێمی فوڕا لە ڕۆژئاوای وڵاتەکە، ئەمەش لە نوێترین هێرشی تاڵیبان لەم چەند ڕۆژەی دواییدا کە ناوەندەکانی هەرێمەکان و کابوڵی پایتەختیان کردە ئامانج.
سەرەڕای ئەوەی ڕەشنوسی ڕێکەوتنێکی ئاشتی هەیە لەنێوان ئەمەریکا و بەرپرسانی تاڵیباندا، هێشتا توندوتیژییەکان باڵیان کێشاوە بەسەر ئەفغانستاندا. ئەگەر هاتوو ڕێکەوتنەکە واژۆ بکرێت ئەوا ژمارەیەکی زۆر لە هێزەکانی ئەمەریکا لە ئەفغانستان دەکشێنەوە و لەبەرامبەردا دەبێت تاڵیبان بەڵێن بدات ڕێگە نەدات گروپە توندڕەوەکان وڵاتەکە بەکاربهێنن بۆ پلاندانان بۆ هێرشکردنە سەر ئەمەریکا و هاوپەیمانەکانی.
وتەبێژی پۆلیسی فوڕا وتی چەکدارانی تاڵیبان گڕیان بەرداوەتە شوێنێکی سەربازیی سوپا، ئەمەش دوای کۆمەڵێک هێرشیان بۆ سەر ژمارەیەک خاڵی سەربازی لەدەوروبەری فوڕا.
وتیشی " تاڵیبان هەوڵدەدات کۆنتڕۆڵی بەندینخانەکە بکات بەڵام هێزەکانی ئاسایش بەرپەرچیان دەدەنەوە."
ئەندامی ئەنجومەنی ناوخۆی فوڕا شا مەحمود نعێمی وتی شەقامە سەرەکییەکان چۆڵن و لە دەوروبەری ناوچەکە تەقە هەیە.
سەرەڕای ئەوەی بەرپرسێکی باڵای ئاسایش لە کابوڵ وتی فوڕا هێشتا لەژێر کۆنتڕۆڵی حکومەتدایە، بەڵام تاڵیبان دەستی گرتووە بەسەر کۆمەڵێک شوێنی شارەکەدا، لەوانەش خوێندنگایەک.
سەرچاوە/ ڕۆیتەرز