سەرۆکی فەرەنسا ئیمانوێڵ ماکرۆن هۆشداری دا بە تورکیا کە هێرشەکانی دژ بە شەڕڤانە کوردەکان لە باکوری سوریا نابێت ببێت بە بیانویەک بۆ داگیرکردنی وڵاتەکە و گوتیشی دەیەوێت ئانکەرە هاوئاهەنگی لەگەڵ هاوپەیمانانیدا بکات.
هەفتەی ڕابوردوو تورکیا هێرشێکی ئاسمانی و زەمینی کردە سەر باکوری ڕۆژئاوای سوریا، کە تیایدا شەڕڤانانی یەپەگەی لە کانتۆنی عەفرین کردۆتە ئامانج. ئەمەش بەرەیەکی نوێی لە شەڕی ناوخۆی 7 ساڵەی سوریا دروست کردو هەروەها پەیوەندییەکانی تورکیای لەگەڵ هاوپەیمانانی ناتۆدا ئاڵۆز کرد.
لە میانەی وتووێژێکدا لەگەڵ ڕۆژنامەی لۆ فیگارۆ کە لە ڕۆژی چوارشەممە بڵاوبۆتەوە، ماکرۆن دەڵێت " ئەگەر ئەم ئۆپەراسیۆنە ببێت بە هەر شتێکی زیاتر لە شەڕی دژ بە هەڕەشەی تیرۆرستی لە سەر سنوری تورکیا و ببێت بە ئۆپەراسیۆنێک بۆ داگیر کردن، ئەو کاتە دەبێتە گرفتێکی گەورە بۆمان."
سەرۆک وەزیری تورکیا بینالی یەلدەرەم بەرگری لە ئۆپەراسیۆنەکە دەکات و دەڵێت تەنها بە مەبەستی پاراستنی باری ئاسایشی وڵاتەکەی و پاراستنی، عەرەبەکان، کوردەکان و تورکومانەکانە لە ڕێکخراوە تیرۆرستیەکان.
لە میانەی کۆنفرانسێکی ڕۆژنامەوانیدا لەگەڵ سەرۆک وەزیری لوبنان سەعد حەریری لە ئانکەرە یەلدەرەم گوتی " ئەگەر فەرەنسا ئەم مەسەلەیە وەکو ئۆپەراسیۆنێکی داگیرکاری لێک دەداتەوە، دەبێت هەڵسەنگاندن بۆ کارەکانی ئەوان بکەین کەلە سوریا کردویانە."
وڵاتە یەکگرتووەکانی ئەمەریکا و فەرەنسا چەکیان داوە بە یەپەگە و هەروەها مەشق و ڕاهێنانیشیان پێیان کردووە بۆ شەڕی دژ بە داعش لە سوریا.
ماکرۆن گوتوشیەتی ئەو جارێکی تر لەگەڵ سەرۆکی تورکیا ڕەجەب تەیب ئەردۆغان باس لەم مەسەلەیە دەکات و دەبێت شێوازی ئۆپەراسیۆنەکە ببێت بە بابەتی وتووێژی نێوان ئەوروپاییەکان بە گەشتی و هاوپەیمانان بە تایبەتی.