هاوپەیمانی بۆ دیموکراسی و دادپەروەری بە سەرۆکایەتی دکتۆر بەرهەم ساڵح ناوی خۆی وەکو قەوەرایەکی سیاسیی لە کۆمسیۆنی باڵای سەربەخۆی هەڵبژاردنەکاندا تۆمارکردووە و لە داهاتوویەکی نزیکیشدا کۆنگرەی دامەزراندن دەبەستێت.
دکتۆر ڕێبوار کەریم، وتەبێژی هاوپەیمانی بۆ دیموکراسی و دادپەروەری بە دەنگی ئەمریکای ڕاگەیاند کە ئەوان بە نیازن "لە سەرجەم هەڵبژاردنەکانی داهاتووی عێراق و هەرێمی کوردستاندا بەشداری بکەن و خۆیان بۆ ئەو پرسە ئامادەکردووە".
هەروەها داوای لە هەموو لایەنەکان کرد کە "لە بەرەیەکی هاوبەشدا کۆببنەوە و بەیەکەوە هەوڵبدەن بۆ گۆڕینی سیستەمی حوکمڕانی و هەموو جومگەکانی دەسەڵات لە هەرێمی کوردستاندا".
جێی ئاماژەیە، د. بەرهەم ساڵح پێشتر جێگری سکرتێری یەکێتی نیشتیمانی کوردستان بوو، بەڵام دەستی لە کار کێشایەوە و هاوپەیمانی بۆ دیموکراسی و دادپەروەری دامەزراند.