سەرۆكى هەرێمى كوردستان لیژنەیەک پێكدەهێنێت بۆ ئەوەى بەدواداچوون بۆ چارەنوسى ئەو پێشمەرگانە بكات كە لاى داعشن. بریارە لیژنەكە ئەمڕۆ لەگەڵ كەس و كارى پێشمەرگە دیلكراوەكاندا كۆ ببێتەوە.
تاریق رەفیق باوكى ئاسۆ كە یەكێكە لە پێشمەرگە دیلكراوەكانى لاى داعش و ڕۆژى یەكشەممە چاوی بە بارزانی کەوت، بەدەنگى ئەمەریكاى ڕاگەیاند"كاتێک گرتەى ڤیدیۆیى سەربرینى 7 پێشمەرگەكە بڵاو كرایەوە ، مردنمان بەچاوى خۆمان بینى ، بۆیە خێرا خۆمان گەیاندە مەسعود بارزانى."
گوتیشی"بارزانى لیژنەیەكى بەسەرۆكایەتى دكتۆر فواد حسێن پێكهێناوە بە مەبەستى كاركردن بۆ ئازاد كردنى دیلەكان و ئەمرۆ لەگەڵ لیژنەكەشدا كۆ دەبینەوە."
پێشتر چەند سەرۆک عەشیرەتێكى عەرەب هەوڵى نێوانگیرى كردنیان لە نێوان پێشمەرگە و داعش دا بۆ ئازاد كردنى پێشمەرگە دیلكراوەكان ، بەڵام هەوڵەكانیان سەركەوتوو نەبوو.
زانیاری زیاتر لەم ڕاپۆرتەی پەیامنێرمان دڵشاد ئەنوەر ببیستە.
