Accessibility links

به‌ره‌ی نوسره‌ هێرش ده‌کاته‌ سه‌ر شوێنه‌کانی لایه‌نێـکی ئۆپـۆزسیۆن له‌ باکوری سوریا


کۆمه‌ڵه‌ی سوریا بۆ چاودێری مافه‌کانی مرۆڤ ده‌ڵێت به‌ره‌ی نوسره‌ی سه‌ر به‌ ئه‌لقاعیده‌ هێرشیان کردووه‌ته‌ سه‌ر شوێنه‌کانی بزوتنه‌وه‌ی حه‌زمی ئۆپـۆزسیۆن له‌ ناوچه‌ گوندیـیه‌کانی حه‌له‌ب و باکوری پارێزگای ئیدلیب، ئه‌مه‌ش وه‌ک هه‌وڵێـکی ئه‌م گرووپه‌ بۆ داگیرکردنی ناوچه‌ی دیکه‌ له‌ باکوری سوریادا.

کۆمه‌ڵه‌که‌ له‌ به‌یانـنامه‌یه‌کدا گوتی ڕۆژی هه‌ینی شه‌ڕه‌کان له‌ ده‌وروبه‌ری گوندی که‌فرنوران و موهه‌ندسین و شێخ عه‌لی له‌ ناوچه‌ گوندیـیه‌کانی حه‌له‌ب ڕوویانداوه‌ و پاشـان ناوچه‌کانی باکوری پارێزگای ئیدلیبی گرتووه‌ته‌وه‌.

ڕامی عه‌بدولڕه‌حمان به‌رپرسی کۆمه‌ڵه‌ی چاودێری گوتی پـێـکدادانه‌که‌ له‌ ڕۆژی پـێنچشه‌ممه‌وه‌ ده‌سـتیپـێـکرد، کاتێـک چه‌کدارانی به‌ره‌ی نوسره‌ هێرشیان کرده‌ سه‌ر باره‌گای فه‌وجی 111 له‌ ناوچه‌ گوندیـیه‌کانی حه‌له‌ب. گوتیشی ئه‌و باره‌گایه‌ له‌ کۆتایـیه‌کانی سـاڵی 2012 وه‌ له‌شـکری سوریا له‌ده‌سـتی داوه‌، به‌ڵام له‌ شه‌ڕه‌که‌ی پـێـنجشه‌ممه‌ به‌ره‌ی نوسره‌ توانی ده‌سـتی به‌سه‌ردابگرێت و ژماره‌یه‌ک له‌ چه‌کدارانی بزوتنه‌وه‌ی حه‌زمیش ده‌سـتگیربکات.

سه‌باره‌ت به‌م هێرشانه‌، بزوتنه‌وه‌ی حه‌زم که‌ ڕۆژئاوا پشـتیوانی لێده‌کات، به‌یانـنامه‌یه‌کی ده‌رکرد و تیایدا به‌ توندی سه‌رزه‌نشتی به‌ره‌ی نوسره‌ی کرد و گوتویه‌تی هه‌تا دوا دڵۆپه‌ی خوێنیان به‌رگری له‌ خۆیان ده‌که‌ن.

XS
SM
MD
LG