کاربەدەسـتانی یەمەن دەڵێن لە ئاکامی زنجیرەیەک تەقینەوە کە سەربازانی یەمەنیان کردبووە ئامانج لە شاری موکەلـلا باشوری وڵاتەکە بە لایەنی کەم 38 کەس کوژراون و بە دەیان کەسی دیکە برینداربوون.
بەپـێی سەرچاوەکان ئێوارەی ئەمڕۆ دووشەممە کاتێـک سەربازەکان لە ناوچەی دیس سەرقاڵی نوێژ و ڕۆژووشکاندن بوون 3 خۆکوژ لە یەک کاتدا خۆیان پـیادا تەقاندوونەتەوە. دوابەدوای ئەم تەقینەوانە، خۆکوژێـکی دیکە بە ئۆتۆمبیلێـکی بۆمبڕێژکراو خۆی بە دەروازەی بارەگای دەزگای هەواڵگری لە ناوچەی ئەلفوە تەقاندووەتەوە.
لە نێو قوربانیـیەکان ژنێـک و منداڵێـک هەیە کە لە نزیک یەکێـک لە شوێنەکان تێپەڕ بووبوون.
هەرچەندە گومان دەکرێت ڕێکخراوی قاعیدە لە پشـت هێرشەکەوە بێت، بەو پـێـیەی هەتا مانگی چواری ڕابردوو ئەو شارە بەدەسـت ئەو گروپە تێرۆرستیـیەوە بووە، بەڵام داعش لەسەر ئنتەرنێت بەرپـرسیارێتی خۆی لێ ڕاگەیاند.