Accessibility links

وائیل عه‌بدولله‌تیف: گێڕانه‌وه‌ی ئه‌و چه‌ند ئه‌ندامه‌ی ئه‌لعێراقیه‌ بۆ ناو پرۆسه‌ی سیاسی، بۆ دڵڕاگرتنی سیاسیه‌‌

  • Balen Salih

ساڵح ئه‌لموتڵه‌گ بۆ ده‌زگاکانی ڕاگه‌یاندن ده‌دوێت، (ئه‌رشیفی وێنه‌)

ساڵح ئه‌لموتڵه‌گ بۆ ده‌زگاکانی ڕاگه‌یاندن ده‌دوێت، (ئه‌رشیفی وێنه‌)

له‌ دانیشتنه‌که‌ی ڕۆژی شه‌ممه‌ی په‌رله‌ماندا، بڕیاردرا بۆ گێڕانه‌وه‌ی سیان له‌و چوار ئه‌ندامه‌ی لیستی ئه‌لعێراقیه‌ که‌ پێشتر به‌ پێی بڕیارێکی لیژنه‌ی لێپێچینه‌وه‌ و دادوه‌ری له‌ پرۆسه‌ی سیاسی عێراق وه‌ده‌رنران ، به‌ تاوانی هه‌بوونی په‌یوه‌ندی له‌گه‌ڵ ڕژێمه‌که‌ی پێشوی سه‌دام حوسه‌ین و بانگه‌شه‌کردن بۆ ئایدیۆلۆژیای به‌عسێتی له‌ عێراقدا.

وائیل عه‌بدولله‌تیف ، ئه‌ندامی په‌رله‌مانی عێراق له‌سه‌ر لیستی هاوپه‌یمانێتی نیشتیمانی ده‌ڵێت گێڕانه‌وه‌ی دکتۆر ساڵح ئه‌لموتڵه‌گ و زافر ئه‌لعانی و جه‌مال ئه‌لکه‌ربولی ، به‌ره‌نجامێکی چاره‌سه‌رکردنی قه‌یرانی سیاسی عێراق بووه‌.

ئه‌م ئه‌ندامه‌ی په‌رله‌مانی عێراق ده‌ڵێت ، بڕیاره‌که‌ی په‌رله‌مانیش بۆ گێڕانه‌وه‌ی ئه‌و سێ ئه‌ندامه‌ی لیستی ئه‌لعێراقیه‌ ده‌روازه‌ی کێشه‌ی تریش ده‌کاته‌وه‌ ، چونکه‌ به‌ یه‌ک چاو نه‌ڕوانراوه‌ته‌ دۆسێی به‌عسیه‌ کۆنه‌کان.

وائیل عه‌بدولله‌تیف، ئاگاهیش ده‌دات که‌ له‌م گه‌ڕه‌ی په‌رله‌ماندا ژماره‌ی ئه‌و به‌عسیانه‌ی بۆ ئه‌ندامێتی په‌رله‌مان هه‌ڵبژێردراون که‌م نین و وه‌ک ده‌شڵێت بۆ هه‌ڵبژاردنه‌که‌ی ساڵی دوو هه‌زار و چوارده‌ ژماره‌که‌ زیاتریش ده‌بێت.

له‌ لێداوانه‌که‌یدا له‌گه‌ڵ به‌شی کوردی ده‌نگی ئه‌مریکادا ، به‌ڕێز عه‌بدولله‌تیف ئه‌و دیارده‌یه‌ی باسی لێوه‌ ده‌کات ده‌گه‌ڕێنێته‌وه‌ بۆ فشاری سیاسی و ده‌شڵێت هه‌رچه‌نده‌ زیاتر بۆیان بچێته‌ سه‌ر ، ئه‌وه‌نده‌ و زیاتریش ژماره‌ی ئه‌وانه‌ی به‌عسیانه‌ بیر ده‌که‌نه‌وه‌ له‌ پرۆسه‌ی سیاسی عێراقدا له‌ زیادی ده‌دات.

له‌سه‌ر بنچینه‌ی گفت و گۆکه‌ی له‌گه‌ڵ وائیل عه‌بدولله‌تیف ، ئه‌ندامی په‌رله‌مانی عێراق له‌سه‌ر لیستی هاوپه‌یمانێتی نیشتیمانی ، هاوکارمان به‌ڵێن ساڵح ئه‌م ڕاپۆرته‌ی ئاماده‌ کردووه‌.

ده‌توانن له‌ ڕێی کلیککردنی ئه‌و فایله‌ ده‌نگیانه‌ی سه‌ره‌وه‌ی ده‌سته‌ چه‌پ گوێبیستی ده‌قی ڕاپۆرته‌که‌ بن که‌ ماوه‌که‌ی 5:25 خوله‌که‌.

بابه‌تی په‌یوه‌ندیدار

XS
SM
MD
LG