Accessibility links

کۆریای باشور ده‌ڵێت ئه‌مه‌ریکا شاندێـکی خۆی بۆ کۆریای باکور ده‌نێرێت

  • VOA News

ستیڤن بۆسۆرت نوێنه‌ری تایبه‌تی وڵاته‌ یه‌کگرتووه‌کانی ئه‌مه‌ریکا بۆ کۆریای باکور له‌ میانه‌ی کۆنگره‌یه‌کی ڕۆژنامه‌وانی له‌ سیئۆل، دووشه‌ممه‌ 16 ی پـێـنجی 2011

ستیڤن بۆسۆرت نوێنه‌ری تایبه‌تی وڵاته‌ یه‌کگرتووه‌کانی ئه‌مه‌ریکا بۆ کۆریای باکور له‌ میانه‌ی کۆنگره‌یه‌کی ڕۆژنامه‌وانی له‌ سیئۆل، دووشه‌ممه‌ 16 ی پـێـنجی 2011

کاربه‌ده‌ستێکی کۆریای باشور ده‌ڵێت وڵاته‌ یه‌کگرتووه‌کانی ئه‌مه‌ریکا بڕیاری داوه‌ نوێنه‌ر بنێرێته‌ کۆریای باکور بۆ تاووتوێکردنی داواکاری به‌ په‌له‌ی ئه‌و ڕژێمه‌‌ کۆمۆنیسته‌ بۆ یارمه‌تی خۆراک.

ئه‌و کاربه‌ده‌سته‌ ئه‌مڕۆ سێشه‌ممه‌ ئه‌م قسانه‌ی له‌ سیئۆڵ کرد به‌ مه‌رجێک که‌ ناوی نه‌هێنرێت له‌به‌ر ئه‌وه‌ی هێشتا بڕیاره‌که‌ به‌ ڕه‌سمی ڕانه‌گه‌‌یه‌نراوه‌. ستیڤن بۆسۆرت نوێنه‌ری تایبه‌تی وڵاته‌ یه‌کگرتووه‌کانی ئه‌مه‌ریکا بۆ کۆریای باکور گوتی ڕاگه‌یاندنێک له‌ ماوه‌ی چه‌ند ڕۆژی داهاتوو له‌ واشنتن ده‌درێت.

بۆسۆرت ئه‌مڕۆ سێشه‌ممه‌ له‌ سیئۆڵ بوو بۆ وتووێژکردن له‌گه‌ڵ نوێنه‌ری باڵای کۆریای باشور بۆ وتووێژه‌ شه‌ش لایه‌نییه‌کان له‌سه‌ر به‌رنامه‌ی ناوکی کۆریای باکور. گوتی خۆی و ووی سۆنگ لاکی نوێنه‌ری کۆریای باشور وتووێژێکی چڕوپڕیان ئه‌نجام دا له‌سه‌ر داوا کارییه‌که‌ی کۆریای باکور بۆ خۆراک و بیرو بۆچونیان له‌ یه‌که‌وه‌ نزیک بوو.

ئاژانسی هه‌واڵی یۆنهاپی کۆریای باشور ڕایگه‌یاندووه‌ که‌ ڕۆبه‌رت کینگی نوێنه‌ری تایبه‌تی ئه‌مه‌ریکا بۆ مافی مرۆڤی کۆریای باکور له‌ هه‌فته‌ی داهاتوو ده‌چێت بۆ پیۆنگیانگ بۆ تێگه‌یشتنی ته‌واو له‌ قه‌یرانی خۆراکی ئه‌و وڵاته‌.

XS
SM
MD
LG