سه‌رۆکی وڵاته یه‌کگرتووه‌کان باراک ئۆباما بانگهێشـتی ڕێبه‌رانی کۆماری و دیموکراتی کۆنگرێسی کردووه بۆ دۆزینه‌وه‌ی ڕێـگایان بۆ پـێـکه‌وه کارکردن له‌سه‌ر مه‌سه‌له سه‌ره‌کیـیه‌کان، ئه‌مه‌ش پاش ئه‌وه‌ی که کۆماریـیه‌کان له هه‌ڵبژاردنه‌کانی نیو تێرمدا کۆنتڕۆڵی ئه‌نجومه‌نی نوێنه‌رانیان گرته ده‌سـته‌وه.
ڕۆژی پـێنجشه‌ممه سه‌رۆک ئۆباما پاش کۆبوونه‌وه‌یه‌کی کابینه‌ته‌که‌ی گوتی که‌وا خۆی داوای له دوو ڕێبه‌ری کۆماریـیه‌کان کردووه، واته ڕێبه‌ری که‌مینه‌ی سینات میچ مه‌ککۆنێڵ و ئه‌ندامی کۆنگرێس جان به‌ینه‌ر که له‌گه‌ڵ ڕێبه‌ری زۆرینه‌ی سینات هاری ڕیدی دیموکرات و سه‌رۆکی ئه‌نجومه‌نی نوێنه‌ران نانسی پـلۆسی له 18 ی ئه‌م مانگه له کۆشـکی سـپی کۆبـبنه‌وه.
چاوه‌ڕوان‌ده‌کرێت جان به‌ینه‌ر بـبێته سه‌رۆکی داهاتووی ئه‌نجومه‌نی نوێنه‌ران کاتێـک که کۆنگرێسی نوێ له مانگی یه‌ک ده‌سـتبه‌کارده‌بێت.
سه‌رۆک ئۆباما گوتی کۆبوونه‌وه‌که سه‌نگی ده‌خاته سه‌ر ئه‌وه‌ی چی له ده‌توانرێت بکرێت بۆ دۆزینه‌وه‌ی ڕێـگه چاره‌سه‌ری بۆ مه‌سه‌له هه‌نووکه‌یـیه‌کانی ئابوری به‌ر له‌وه‌ی کۆنگرێسی نوێ ده‌سـتبه‌کاربێت. گوتی ئه‌مه گرنگه که به‌ره‌و پـێشه‌وه بڕۆیت، چونکه خه‌ڵـکی ئه‌مه‌ریکا نایانه‌وێت حکومه‌ت بکه‌وێته مشـتومڕی حزبایه‌تیـیه‌وه و هیچ شـتێـک وه‌ده‌ست نه‌یه‌ت.
له هه‌مان کاتدا ڕۆژی پـێـنجشه‌ممه سیناتۆر میچ مه‌ککۆنێڵ هه‌ندێ له به‌رنامه‌ی پارتیـیه‌که‌ی دیاریده‌کات، له نێویاندا هه‌وڵێـک بۆ لێـسه‌ندنه‌وه‌ی کۆشـکی سـپی له سه‌رۆک ئۆباما.
بڕیاره سیناتۆر مه‌ککۆنێڵ ئه‌و مه‌سه‌له‌یه له وتارێـکی له کۆنسێرڤه‌تیڤ هێرتیج فاوه‌نده‌یشندا باس بکات.
له هه‌ندێ بڕگه‌ی وتاره ئاماده‌کراوه‌که‌یدا سیناتۆر مه‌ککۆنێڵ به‌رگری له‌و تێبینیـیانه ده‌کات که‌وا تێدا گوتبووی ئه‌رکی سه‌ره‌کی کۆماریـیه‌کان له دوو سـاڵی داهاتوودا پـێویسـته دڵنیاکردنی ئه‌وه‌بێت که سه‌رۆک ئۆباما بۆ گه‌ڕێـکی دیکه‌ی سه‌رۆکایه‌تی هه‌ڵنه‌بژێردرێته‌وه.
مه‌ککۆنێڵ ده‌ڵێت ته‌نیا ڕێگا بۆ پارتیـیه‌که‌ی بۆ جێبه‌جێکردنی ئامانجه‌کانی له‌مه‌ڕ پـوچه‌ڵکردنه‌وه‌ی قانونی بایه‌خی ته‌ندروسـتی سه‌رۆک ئۆباما و بڕینی خه‌رجی و که‌مکردنه‌وه‌ی قه‌واره‌ی حکومه‌ت، ئه‌وه‌یه یه‌کێـک له کۆشـکی سـپی دابنێت که‌وا ئه‌و هه‌نگاوانه ڤیتۆ نه‌کات.
هه‌ڵبژاردنی داهاتووی سه‌رۆکایه‌تی ئه‌مه‌ریکا له سـاڵی 2012 ئه‌نجام ده‌درێت.
کۆماریـیه‌کان ئه‌وه‌نده کورسـیـیان له ده‌نگدانه‌که‌ی ڕۆژی سێشه‌ممه برده‌وه که کۆنتڕۆڵی ئه‌نجومه‌نی نوێنه‌ران بگرنه ده‌سـته‌وه و هه‌ندێ کورسی سیناتیشیان له دیموکراته‌کان سه‌نده‌وه.
سه‌رۆک ئۆباما دانی پـیانا که پارتیـیه‌که‌ی شـکسـتێـکی مه‌زنی له ده‌نگدانه‌که خواردووه و ده‌ڵێت دۆڕانه‌کانی دیموکرات ڕه‌نگدانه‌وه‌ی بێزاریـیه سه‌باره‌ت به خراپـی باری ئابوری.
شایه‌نی باسه ئه‌و کاندیدانه‌ی که فه‌رمانداری پـێشـووی ویلایه‌تی ئالاسـکا سارا په‌یلن پـشـتیوانی لێـکردن له بزوتنه‌وه‌ی تی پارتیدا هه‌ندێـکیان سه‌رکه‌وتنیان وه‌ده‌سـتهێناوه و هه‌ندێـکیان بوونه مایه‌ی ئه‌وه‌ی کۆماریـیه‌کان نه‌توانن کورسی سینات له ولایه‌ته‌کانی مه‌ین و نیڤادادا ببه‌نه‌وه.
