Accessibility links

ئۆکرانیا کەسێـکی تێرۆرستی فەڕەنسایی بە 150 کیلۆگرام تەقەمەنی دەسـتگیردەکات

  • VOA News

ڤاسیل گریتساک سەرۆکی دەزگای هەواڵگری ئۆکرانیا

دەسەڵاتدارانی ئۆکرانیا دەڵێن کەسێـکیان دەسـتگیرکردووە ڕەگەزنامەی فەڕەنسایی هەیە کە خۆی ئامادە کردبوو هێرشی تێرۆرستی ئەنجام بدات لە میانەی یاریـیەکانی جامی 2016 ی ئەوروپا بۆ تۆپی پـێ، ئەوەی بڕیارە ڕۆژی هەینی لە فەڕەنسا دەسـتپـێبکات.

میدیاکانی فەڕەنسا دەڵێن کەسەکە ناوی گغیک مواغەموتوویە و تەمەنی 25 سـاڵە و لەسەر سنووری ئۆکرانیا لەگەڵ پـۆڵەندا دەسـتگیرکراوە.

ڤاسیل گریتساک سەرۆکی دەزگای هەواڵگری ئۆکرانیا ئەمڕۆ دووشەممە ڕایگەیاند ئەو کەسە لە 21 ی مانگی پـێنجەوە دەسـتگیرکراوە بە 125 کیلۆگرام TNT و 2 ئارپـیجی و 5 کلاشینکۆڤ و نزیکەی 5 هەزار فیشەک و بەنیازبوو 15 هێرش لە فەڕەنسا ئەنجام بدات، لەوانە هێرشکردنە سەر پـردەکان، جادە سەرەکیـیەکان، مزگەوت، کەنیشتی جووەکان. گوتیشی کەسێـکی زۆر نەتەوەپەرستە و لە دژی سیاسەتەکانی حکومەتی وڵاتەکەیەتی لەبارەی هاتنی زۆری بیانی بۆ فەڕەنسا و بڵاوبوونەوەی ئاینی ئیسلام تیایدا. بەمەش بە تاوانەکانی بە قاچاغبردنی چەک و تەقەمەنی و هەروەها هەوڵی ئەنجامدانی هێرشی تێرۆرستی دادگایی دەکرێت.

کاربەدەسـتانی ئاسایشی ئۆکرانیا دەڵێن لە مانگی دوازدەی سـاڵی ڕابردووە بە وردی چاودێریان کردووە و ڤیدیۆیەکیان بڵاوکردووەتەوە کە نیشانی دەدات چۆن سەرقاڵی بارکردنی چەکەکان بووە و پاشان هێزەکانی ئاسایش دەسـتگیری دەکەن.

جێی ئاماژەیە یاریـیەکانی جامی ئەوروپا لە 10 ی ئەم مانگی شەشە لە پاریس دەسـتپێـدەکەن و ڕێوشوێنی توند گیراونەتەبەر بۆ پاراستنی خەڵکی. دەڵێن 90 هەزار پـۆلیس و ئاسایش بۆ ئەم کارە تەرخانکراون کە مەزەندە دەکرێت نزیکەی 7 ملیۆن کەس بۆ بینینی یاریـیەکان ڕوو لە پاریس بکەن.

XS
SM
MD
LG