Accessibility links

وەزیری دەرەوەی ئەمەریکا: سێشەممەی داهاتوو کۆمەڵە وڵاتی پشـتگیری لە ئاشتی سوریا دەکەن کۆدەبنەوە

  • VOA News

وەزیری دەرەوەی ئەمەریکا دەڵێت کۆمەڵە وڵاتی پشـتگیری لە ئاشتی بۆ سوریا دەکەن لە سێشەممەی داهاتوو لە ڤیەنـنا کۆدەبنەوە.

جان کێری ئەمڕۆ سێشەممە لە لەندەن ئەمەی بۆ پەیامنێران ڕاگەیاند و گوتی ئەو 17 وڵاتەی پـشـتگیری لە وتووێژەکانی ئاشتی سوریا دەکەن لە 17 ی مانگی پـێنج کۆدەبنەوە.

وەزیری دەرەوەی ئەمەریکا گوتیشی " کۆمەڵە وڵاتی پشـتگیری لە سوریا دەکەن، بە فەرمی کۆدەبنەوە بۆ تەواوکردنی ئەوەی لەگەڵ ڕووسەکاندا دەسـتمانپـێکرد سەبارەت بە ڕێکەوتنەکە و هەروەها قسەکردن لەسەر هەموو شتێـک.. هەر لە ماوەی ڕێکەوتنەکە و جێبەجێکردنی هەتا دەگاتە پرۆسەی سیاسی."

پـێشبینیشی کرد پاش ئەو کۆبوونەوەیە بە چەند ڕۆژێـک وتووێژی ئاشتی بۆ لایەنە بەشەڕهاتووەکانی ناو سوریا ئەنجام بدرێت.

دوێنێ دووشەممە ئەمەریکا و ڕووسیا ڕایانگەیاند کاردەکەن بۆ بوژاندنەوەی ڕێکەوتنی ئاگربەست، ئەوەی توانیویەتی بۆ ماوەی چەند هەفتەیەک شەڕ و پـێکدادان لەو وڵاتە کەمبکاتەوە.

ڕوودانی شەڕی قورس لە شاری حەلەب و دەوربەری لەم ماوەیەی ڕابردوو مەترسی لێدەکرا ببێتە مایەی شکستهێنان بە وتووێژەکانی ئاشتی، ئەوانەی نەتەوە یەکگرتووەکان لە ڤیەنـنا سەرپەرشتی دەکەن.

XS
SM
MD
LG