Accessibility links

چالاکوانانی سوریا: هێزەکانی بەرەی نوسرە و گروپەکانی هاوپەیمانی شارۆچکەیەک لە باشوری حەلەب کۆنترۆڵ دەکەن

  • VOA News

کۆمەڵەی سوریا بۆ چاودێری مافەکانی مرۆڤ دەڵێت چەکدارانی بەرەی نوسرە و جوندی ئەقسا و ئەحرار ئەلشام و چەند گروپێـکی دیکەی ئیسلامی توانیویانە تەواوی شارۆچکەی خان تۆمان لە باشوری ڕۆژئاوای حەلەب کۆنترۆڵ بکەن.

کۆمەڵەکە کە پەیوەندی بە تۆڕێـکی گەورەی چالاکوانانە لە سوریا، ئەمڕۆ هەینی لە بەیانـنامەیەکدا ئەمەی ڕاگەیاند و گوتی پاش ئەوەی لە دوێنێ پـێـنجشەممەوە ئەم گروپە ئیسلامیـیانە هێرشێـکی گەوریان کردە سەر هێزەکانی حکومەت، ئەمڕۆ توانیان شارۆچکەی خان تۆمان و گوندەکانی ئەبو ڕوێل، خربەت حەج، تلتی مستاوی و دلیش لە باشوری حەلەب کۆنترۆڵ بکەن. هەروەها دوێنێش لەو ناوچەیە دەسـتیان گرتبوو بەسەر گوندی خالیدیـیە.

پاشان باسی لە ئاماری کوژراوانی شەڕەکە کرد و نووسیویەتی بە لایەنی کەم 43 چەکداری گروپەکانی ئۆپـۆزسیۆن کوژراون کە یەکێـکیان سەرکردە بووە. هەروەها بە لایەنی کەم 30 چەکداری هێزەکانی حکومەتیش کوژراون و دەیانی دیکەیان برینداربوون. کۆمەڵەکە ئاماژەی بۆ خۆکوژێـکی بەرەی نوسرەش کرد کە ئۆتۆمبیلێـکی بۆمبڕێژکراوی لە نزیک خان تۆمان تەقاندبۆوە.

ئاژانسی دەنگ‌وباسی ڕۆیتەرز دەڵێت ئەبو برائی حەمەوی کە چەکدارێـکی ئەجناد ئەلشامە و لە شەڕەکەدا بەشداربوون، گوتویەتی بە درێژایی شەوی ڕابردوو شەڕێـکی قورس و توند لە ناوچەکە ڕوویانداوە و دواتر توانیویانە ئەو ناوچانە کۆنترۆڵ بکەن. بەڵام ئاژانسەکە دەشڵێت سەرچاوەیەک لە لەشکری سوریا ڕەتی کردووەتەوە خان تۆمان لە لایەن هێزەکانی ئۆپـۆزسیۆنەوە دەسـتی بەسەرداگیرابێت.

XS
SM
MD
LG