Accessibility links

ستیڤ جۆبز دامه‌زرێنه‌ری ئه‌پـڵ ماڵئاوایی لێـکردین

  • Shwan Rashid

ستیڤ جۆبز له‌ کۆنفرانسێـکدا له‌ شاری سان فرانسیسکۆی کالیفۆرنیا دروسـتکردنی iPhone 4 ڕاده‌گه‌یه‌نێت، 7 ی شه‌شی 2010

ستیڤ جۆبز له‌ کۆنفرانسێـکدا له‌ شاری سان فرانسیسکۆی کالیفۆرنیا دروسـتکردنی iPhone 4 ڕاده‌گه‌یه‌نێت، 7 ی شه‌شی 2010

ڕۆژی چوارشه‌ممه‌ ستیڤ جۆبز Steve Jobs که‌ یه‌کێـکه‌ له‌ دامه‌زرێنه‌رانی کۆمپانیای ئه‌پـڵ Apple بۆ کۆمپـیوته‌ر و ته‌له‌فون و ئامێری دیکه‌ی ئه‌لیکترۆنی له‌ ته‌مه‌نی 56 سـاڵیدا کۆچی دوایی کرد.

ئێواره‌ی چوارشه‌ممه‌ کۆمپانیای ئه‌پـڵ له‌ ڕاگه‌یاندنێـکدا ئه‌م هه‌واڵه‌ دڵته‌زێنه‌ی ڕاگه‌یاند و گوتی جیهان مرۆڤێـکی مه‌زن و بلیمه‌تی خۆی له‌ده‌سـتدا. هه‌روه‌ها گوتیشی گیانی ستیڤ بۆ هه‌میشه‌ بنه‌مای ئه‌پڵ ده‌بێت.

سه‌رۆکی وڵاته‌ یه‌کگرتووه‌کانی ئه‌مه‌ریکا براک ئۆباما ئه‌ویش له‌ به‌یانـنامه‌یه‌کدا پـرسه‌ و سه‌ره‌خۆشی خۆی ڕاگه‌یاند و گوتی ستیڤ جۆبز یه‌کێـک بوو له‌ هه‌ره‌ داهێنه‌ره‌ مه‌زنه‌کانی ئه‌مه‌ریکا.

ستیڤ جۆبز له‌گه‌ڵ ئه‌وه‌ی یه‌ک له‌ دامه‌زرێنه‌رانی کۆمپانیای ئه‌پـڵ بوو هه‌روه‌ها سه‌رۆکی جێبه‌جێـکاریشی بوو، به‌ڵام به‌هۆی خراپـی باری ته‌ندروسـتی له‌ 24 ی مانگی هه‌شتی ئه‌مسـاڵدا ده‌ستی له‌ کاره‌که‌ی کێشـایه‌وه‌.

ستیڤ له‌ سـاڵی 2003 دووچاری شێرپه‌نجه‌ی په‌نکریاس بوو و هه‌تا دوایـین سـاته‌کانی ژیانیدا به‌ده‌ست ئاکامه‌کانیـیه‌وه‌ ده‌یناڵان. له‌ سـاڵی 2009 جگه‌ریان بۆ گۆڕی.

ستیڤ جۆبز له‌ 24 ی مانگی دووی سـاڵی 1955 له‌ ویلایه‌تی کالیفۆرنیا له‌ دایکبووه‌. باوکی به‌ ڕه‌چه‌ڵه‌ک خه‌ڵـکی شـاری حومسی سوریایه‌ و ناوی (عه‌بدولفه‌تاح جه‌نده‌لی) یه‌ و دایکی ناوی جوانه‌ سیمسۆنه‌ و خۆشکێـکی هه‌یه‌ به‌ ناوی مونا که‌ ئه‌ویش بۆخۆی نووسه‌رێـکی ناوداره‌ و به‌ Mona Simpson ناسراوه‌. به‌ڵام ستیڤ و مونا له‌ باوه‌شی دایک و باوکی ڕه‌سه‌نی خۆیاندا به‌خێو نه‌کراون، به‌ڵـکو دوو خێزانی جودا دور له‌ یه‌ک گه‌وره‌یان کردوون.

ستیڤ له‌ مانگی سێی سـاڵی 1991 له‌گه‌ڵ لۆرنس بویل خێزانی پـێـکهێناوه‌ و سێ منداڵیان بووه‌. هه‌روه‌ها پـێشـتر منداڵێـکی دیکه‌ی له‌ ژنێـکی دیکه‌ بووه‌ که‌ به‌ر له‌ هاوسه‌رگیرێتی په‌یوه‌ندی له‌گه‌ڵدا هه‌بووبوو.

ستیڤ هه‌رچه‌نده‌ زیره‌ک و بلیمه‌ت بوو، به‌ڵام نه‌یتوانی زانکۆ ته‌واو بکات و هه‌ر له‌ یه‌که‌م سـاڵی زانکۆیدا ده‌رنه‌چوو و وازی له‌ خوێندن هێنا و ده‌سـتی به‌کارکردن کرد هه‌تا بوو به‌ ته‌کنیکار له‌ کۆمپانیای ئه‌تاری Atari بۆ دروسـتکردنی یاری ئه‌لیکترۆنی.

له‌ سـاڵی 1974 دوای ئه‌وه‌ی بڕێـک پاره‌ کۆده‌کاته‌وه‌ به‌ره‌و هیندسـتان ده‌ڕوات تاوه‌کو شـاره‌زایی له‌ ڕووحانیـیاتدا په‌یدا بکات، به‌ڵام پاش ماوه‌یه‌کی کورت ده‌گه‌ڕێته‌وه‌ و له‌گه‌ڵ ستیڤ ۆزنیاکی هاوڕێی له‌ گه‌راجێـکی بچووکدا پـێـکه‌وه‌ کار ده‌که‌ن و یه‌که‌م کۆمپـیۆته‌ری ئه‌پـڵی خۆیان دروسـت‌ده‌که‌ن.

ئێسـتا و دوای 37 سـاڵ ئه‌پـڵ به‌ هیمه‌تی ستیڤ جۆبز و هاوڕێـکانی چه‌ندین داهێنانی گرنگی هێناوه‌ته‌ به‌رهه‌م و بووه‌ به‌ خاوه‌نی ده‌یان ملیار دۆلار و نزیکه‌ی 50 هه‌زار کارمه‌ند، به‌وه‌ش کاریگه‌ریـیه‌کی به‌رچاوی له‌سه‌ر ئابوری ئه‌مه‌ریکادا هه‌یه‌.

ستیڤ جۆبز له‌ نامه‌ی داوای ده‌ست له‌ کارکێشـانه‌وه‌که‌ی که‌ بۆ ده‌سـته‌ی به‌ڕێوه‌به‌رایه‌تی ئه‌پـڵی ناردبوو گوتبووی " من هه‌میشه‌ گوتوومه‌ ئه‌گه‌ر هاتوو ڕۆژێـک نه‌متوانی وه‌ک به‌ڕێوه‌به‌ری جێبه‌جێـکار ئه‌رکه‌کانی سه‌ر شـانم به‌پـێی پـێویست جێبه‌جێ بکه‌م، ئه‌وا خۆم یه‌که‌م که‌س ده‌بم ئه‌وه‌تان پـێ ڕابگه‌یه‌نم. به‌داخه‌وه‌ ئه‌و ڕۆژه‌ هات و داوای ده‌سـت له‌ کارکێشـانه‌وه‌ ده‌که‌م."

هه‌روه‌ها له‌ نامه‌که‌یدا گوتبووی " هێشـتا ڕۆژانی پرشـنگدارتر و داهێنانی زۆرتر له‌ به‌ره‌ده‌م ئه‌پـڵدایه‌."

XS
SM
MD
LG