Accessibility links

له‌ پاکسـتان به‌فری سه‌ر چیایه‌ک هه‌ره‌س ده‌هێنێت و 100 سه‌رباز ده‌که‌ونه‌ ژێری

  • VOA News

کاربه‌ده‌سـتانی پاکسـتان ده‌ڵێن به‌فری سه‌ر چیایه‌کی سه‌هۆڵبه‌ندانی زنجیره‌ چیای هیمالایای هاوسنوری هیندسـتان هه‌ره‌سی هێناوه‌ و له‌ بنکه‌یه‌کی له‌شـکری داوه‌ و له‌ ئاکامدا زیاتر له‌ 100 سه‌رباز که‌وتوونه‌ته‌ ژێری.

ده‌سه‌ڵاتدارانی له‌شـکری ده‌ڵێن به‌یانی شه‌ممه‌ به‌فری سه‌ر چیای سه‌هۆڵبه‌ندانی سیاچین هه‌ره‌سی هێنا، ئه‌و چیای ناسراوه‌ به‌وه‌ی به‌رزترین شوێنی جیهان بووه‌ که‌ شه‌ڕی له‌سه‌ر کرابێت. پاکسـتان و هیندسـتان بنکه‌ و خاڵی له‌شـکریـیان له‌سه‌ری هه‌یه‌.

کاربه‌ده‌سـتان ده‌ڵێن هه‌لیکۆپته‌ر و هێزی فریاگوزاری له‌شـکری و سه‌گی تایبه‌ت ئه‌وانه‌ی به‌ بۆن مرۆڤ ده‌دۆزنه‌وه‌ ڕه‌وانه‌ی ناوچه‌که‌ کراون.

له‌شـکری پاکسـتان ده‌ڵێت هێشتا چاره‌نووسی ئه‌و سه‌ربازانه‌ ڕوون نیـیه‌.

جێی ئاماژه‌ پـێـکردنه‌ چیای ساچین که‌ ده‌که‌وێته‌ باکوری که‌شمیر 6 کیلۆمه‌تر به‌رزه‌ و چه‌قی دوو شه‌ڕ له‌ کۆی ئه‌و سێ شه‌ڕه‌ بوو که‌ له‌ نێوان پاکسـتان و هیندسـتاندا ڕوویانداوه‌ له‌وه‌تای له‌ سـاڵی 1947 وه‌ سه‌ربه‌خۆ بوون.

مه‌زه‌نده‌ ده‌کرێت له‌وه‌تای له‌ سـاڵی 1984 وه‌ که‌ شه‌ڕ و پـێـکدادان له‌و ناوچه‌یه‌ له‌ نێوان پاکسـتان و هیندسـتان ڕوویانداوه‌ له‌ نێوان 10 بۆ 20 هه‌زار سه‌رباز له‌ هه‌ردوولادا کوژرابن. به‌ڵام شاره‌زایانی له‌شـکری ده‌ڵێن ئه‌وه‌نده‌ی سه‌رباز به‌ سه‌ختی که‌ش‌وهه‌وای سه‌ر چیای ساچین گیانیان له‌ ده‌سـتداوه‌ به‌ شه‌ڕ ئه‌وه‌نده‌ نه‌بووه‌.

XS
SM
MD
LG