Accessibility links

سه‌رۆک ئۆباما: ئه‌مه‌ریکا و هیندسـتان 'یه‌کگرتوون' له‌ دژی تێرۆرزمدا

  • VOA News

سه‌رۆک ئۆباما له‌ ده‌می پـێشـکه‌شکردنی وتاره‌که‌ی له‌ هوتێل تاج محه‌لی شـاری مۆمبای هیندسـتان و خانمی یه‌که‌می ئه‌مه‌ریکا میشێل ئۆباما له‌گه‌ڵیدا وه‌سـتاوه‌، شه‌ممه‌ 6 ی یازده‌ی 2010

سه‌رۆک ئۆباما له‌ ده‌می پـێشـکه‌شکردنی وتاره‌که‌ی له‌ هوتێل تاج محه‌لی شـاری مۆمبای هیندسـتان و خانمی یه‌که‌می ئه‌مه‌ریکا میشێل ئۆباما له‌گه‌ڵیدا وه‌سـتاوه‌، شه‌ممه‌ 6 ی یازده‌ی 2010

سه‌رۆکی وڵاته‌ یه‌کگرتووه‌کانی ئه‌مه‌ریکا باراک ئۆباما ڕۆژی شه‌ممه‌ له‌ شاری مۆمبای هیندسـتانه‌وه‌ که‌ ناوه‌ندی دارایی ئه‌و وڵاته‌یه‌ ده‌سـتیکرد به‌ گه‌شته‌که‌ی بۆ ئاسیا.

سه‌رۆک ئۆباما له‌وێ گوتی ئه‌مه‌ریکا و هیندسـتان به‌ یه‌کگرتووانه‌ وه‌سـتاون له‌ به‌رامبه‌ر بڕیاریاندا بۆ مسۆگه‌رکردنی ئاینده‌ی ئاسایش له‌ دژی تێرۆرزم. گوتیشی له‌ ئێسـتادا ئه‌مه‌ریکا و هیندسـتان له‌ هه‌موو کاتێـک زیارتر ئاڵوگۆڕی زانیاریـیه‌ ئاسایشـیـیه‌کان ده‌که‌ن، ئه‌وه‌ش له‌ پـێناوی ڕێـگه‌گرتن له‌ هێرشه‌کان و ڕاپـێچـکردنی هێرشبه‌ران بۆ به‌رده‌م دادگا.

گوتیشی ئه‌و خوازیاره‌ پاش کۆبوونه‌وه‌ی له‌گه‌ڵ سه‌رۆک وه‌زیری هیندسـتان مانمۆهان سینگ له‌ نیوده‌لهی هاوکاریـیه‌کی قوڵـتر له‌گه‌ڵ هیندسـتاندا هه‌بێت له‌ شه‌ڕی دژه‌ تێرۆرزمدا.

سه‌رۆک ئۆباما له‌ هوتێل تاج محه‌ل قسه‌ی کرد که‌ یه‌کێـک بوو له‌و شوێنانه‌ی له‌ هێرشه‌ تێرۆریسـتیـیه‌کانی مانگی یازده‌ی 2008 ی مۆمبای کرایه‌ نیشانه‌ و تیایدا 166 که‌س گیانیان له‌ده‌سـتدا.

ڕۆژنامه‌وانان و شیکه‌ره‌وانی سیاسی هیندی به‌ خێرایی ئاماژه‌یان دا به‌وه‌ی سه‌رۆک ئۆباما له‌ قسه‌کانیدا باسی له‌ پاکسـتان نه‌کرد که‌ بنکه‌ی 10 هێرشبه‌ره‌که‌ بوو. هیندسـتان ئۆباڵی هێرشه‌کانی مۆمبای ده‌خاته‌ ئه‌سـتۆی له‌شـکری تیبه‌ی بنکه‌ له‌ پاکسـتان.

شایه‌نی باسه‌ هیندسـتان یه‌که‌م شوێنی وه‌سـتانی سه‌رۆک ئۆبامایه‌ له‌ گه‌شـته‌ 10 ڕۆژیـیه‌که‌ی بۆ ئاسیا که‌ تیایدا سه‌نگی ده‌خاته‌ سه‌ر په‌ره‌پـێدانی په‌یوه‌ندیـیه‌ ئابوریـیه‌کان. هه‌روه‌ها سه‌ردانی ئه‌نده‌نوسیا و کۆریای باشور و ژاپـۆن ده‌کات.

XS
SM
MD
LG