Accessibility links

کۆمه‌ڵێـکی مافه‌کانی مرۆڤ داوا له‌ سه‌رهه‌ڵـداوانی لیبیا ده‌کات خه‌ڵـکی سـیڤیل بـپارێزن


کۆمه‌ڵێـکی مافه‌کانی مرۆڤ داوا له‌ سه‌رهه‌ڵـداوانی لیبیا ده‌کات خه‌ڵـکی سـیڤیل بـپارێزن
کۆمه‌ڵێـکی مافه‌کانی مرۆڤ داوا له‌ سه‌رهه‌ڵـداوانی لیبیا ده‌کات خه‌ڵـکی سـیڤیل بـپارێزن

ڕێـکخراوێـکی مافه‌کانی مرۆڤ داوا له‌ سه‌رهه‌ڵـداوانی ئۆپـۆزسیۆنی لیبیا له‌ ناوچه‌کانی ڕۆژئاوای لیبیا ده‌کات که‌ ژیانی خه‌ڵـکانی سیڤیل له‌و شـارۆچکانه‌ی له‌ ژێر ده‌سه‌ڵاتیاندایه‌ بیپارێزن و به‌رپـرسیارێتیش بگرنه‌ ئه‌سـتۆ سه‌باره‌ت به‌ ڕاپـۆرته‌کانی تاڵانکردن و پـێشـێـلکاریـیه‌کانی تر.

ئه‌مڕۆ ڕێـکخراوی چاودێری مافه‌کانی مرۆڤ بنکه‌ له‌ نیویۆرک ڕایگه‌یاند که‌ سه‌رهه‌ڵـداوانی ئۆپـۆزسیۆن و لایه‌نگرانیان زیانیان به‌ موڵک و ماڵی خه‌ڵـک گه‌یاندووه‌ و نه‌خۆشـخانه‌ و ماڵ و حاڵی خه‌ڵکیشـیان تاڵانکردووه‌ و لایه‌نگرانی ڕابه‌ری لیبی موعه‌ممه‌ر قه‌زافیـیان داوه‌.

ڕێـکخراوی ناوبراو ده‌ڵێت ئه‌م پـێشـێلکاریـیانه‌ له‌ شـارۆچکه‌کانی ژێر ده‌سه‌ڵاتی سه‌رهه‌ڵـداوان ڕوویانداوه‌ که‌ بریتین له‌ ئه‌لئه‌وانیـیه‌ و ڕه‌یانیـیه‌ و زاویه‌ت ئه‌لبه‌گول و ئه‌لقه‌والیش که‌ ده‌که‌ونه‌ چیاکانی نه‌فوسه‌وه‌.

ڕێـکخراوی چاودێری مافه‌کانی مرۆڤ ده‌ڵێت فه‌رمانده‌ی سه‌رهه‌ڵـداوان له‌و ناوچانه‌دا ڕوودانی ئه‌م پـێشـێلکاریـیانه‌ی پـشـتڕاسـتکردۆته‌وه‌ و ڕاشیگه‌یاندووه‌ که‌ هه‌ندێـک له‌ به‌رپـرسـانی ئه‌م پـێشـێلکاریـیانه‌ سـزادراون. هه‌مان ڕێـکخراو ده‌ڵێت له‌ ماوه‌ی دوو مانگی ڕابردوودا زۆر جار هێزه‌کانی حکومه‌تی لیبیا له‌و ناوچانه‌دا هێرشیان کردووه‌ته‌ سه‌ر خه‌ڵـکانی سیڤیل به‌ به‌کارهێنانی مینه‌وه‌.

هاوکات وه‌زیری ده‌ره‌وه‌ی فه‌ڕه‌نسـا ڕایگه‌یاند که‌ ئه‌ندامانی هاوبه‌ندی ناتۆ په‌یوه‌ندیان به‌ نێردراوه‌کانی موعه‌ممه‌ر قه‌زافیـیه‌وه‌ کردووه‌ و ده‌ڵێن ڕابه‌ری لیبیا ئاماده‌یه‌ ده‌سـتبه‌رداری ده‌سه‌ڵات بـبێت.

ڕۆژی سێشه‌ممه‌ ئالان ژوپـپـێ ڕایگه‌یاندبوو که‌ هێشـتا مشتومڕه‌کان نه‌چوونه‌ته‌ چوارچێوه‌ی ته‌واوی دانوسـتاندنه‌وه‌، به‌ڵام گوتی نێردراوه‌کانی قه‌زافی به‌ ده‌سه‌ڵاتدارانی فه‌ڕه‌نسـا و کاربه‌ده‌سـتانی دیکه‌یان ڕاگه‌یاندووه‌ که‌ به‌ڕێز قه‌زافی ئاماده‌یه‌ بڕوات.

XS
SM
MD
LG