Accessibility links

بۆمبێـکی ده‌نگی له‌ نزیک خۆپـیشـانده‌رانی به‌ر ده‌رکی سه‌رای سلێمانی ده‌ته‌قێته‌وه‌

  • Latif Nirwayi

بۆمبێـکی ده‌نگی له‌ نزیک خۆپـیشـانده‌رانی به‌ر ده‌رکی سه‌رای سلێمانی ده‌ته‌قێته‌وه‌

بۆمبێـکی ده‌نگی له‌ نزیک خۆپـیشـانده‌رانی به‌ر ده‌رکی سه‌رای سلێمانی ده‌ته‌قێته‌وه‌

خۆپـیشـاندانه‌کانی ناڕه‌زایی ده‌ربڕین له‌ پارێزگای سلێمانی کوردسـتانی عێراق به‌رده‌وامی هه‌یه‌ و سه‌رچاوه‌کانی هه‌واڵ ئاماژه‌یان به‌ ته‌قینه‌وه‌ی بۆمبێـکی ده‌نگی کردووه‌ له‌ به‌ر ده‌رکی سـه‌رای سلێمانی و به‌ دواشیدا ته‌قه‌ کراوه‌.

له‌ که‌لاریش ئه‌مڕۆ پاش نیوه‌ڕۆ به‌ کاتی کوردسـتان، خۆپـیشـانده‌ران له‌ به‌رده‌م قوتابخانه‌ی له‌یلا قاسمدا گردبووبوونه‌وه‌ و له‌وێش ته‌قه‌ کراوه‌ته‌وه‌.

له‌تیف نێروه‌یی په‌یامنێری ده‌نگی ئه‌مه‌ریکا له‌ سلێمانی له‌ کاتژمێر 5:20 ی پاش نیوه‌ڕۆ به‌ کاتی کوردسـتان ڕاپـۆرتی ڕاسته‌وخۆ دا.

له‌تیف نێروه‌یی ده‌ڵێت به‌ر له‌ نیو کاتژمێر و له‌ کاتی به‌ڕێوه‌چوونی خۆپـیشـاندان له‌ به‌ر ده‌رکی سه‌رای شـاری سلێمانی بۆمبێـکی ده‌نگی ته‌قیوه‌ته‌وه‌، هاوکات به‌پـێی شـایه‌تحاڵه‌کان که‌سێـکی که‌ جلوبه‌رگی مه‌ده‌نی له‌به‌ردابووه‌ ته‌قه‌ی کردووه‌، به‌ڵام هه‌تا ئێسـتا ڕوون نیـیه‌ زیانه‌ گیانیـیه‌کان چه‌نده‌، هه‌ندێـک سه‌رچاوه‌ ده‌ڵێن که‌سێـک کوژراوه‌، هه‌ندێـکی دیکه‌ ده‌ڵێن 3 که‌س بریندارن و هه‌ندێـکی دیکه‌ش ده‌ڵێن 5 که‌س برینداربوون، به‌ڵام ئه‌وه‌ی هه‌تا ئێسـتا گه‌یشـتۆته‌ نه‌خۆشـخانه‌ 3 برینداره‌.

سه‌باره‌ت به‌ خۆپـیشـاندانه‌کانی که‌لاریش له‌تیف نێروه‌یی ده‌ڵێت پـێش ماوه‌یه‌کی که‌م ڕۆژنامه‌وان شاخه‌وان محه‌مه‌د له‌ که‌لاره‌وه‌ پـێی‌ڕاگه‌یاندووه‌ که‌وا خۆپـیشـاندانه‌که‌ به‌رده‌وامه‌ و شه‌ڕه‌ به‌ردیش له‌ نێوان خۆپـیشـانده‌ران و هێزه‌کانی ناوخۆ به‌رده‌وامه‌، به‌ڵام خۆپـیشـانده‌ران نه‌گه‌یشـتوونه‌ته‌ لای هیچ ده‌زگایه‌کی حکومی و حزبی و ته‌نها له‌ نزیک ناوبازاڕه‌وه‌ن.

له‌ چه‌مچه‌ماڵیش دوێنێ هه‌ینی به‌هۆی توندوتیژی خۆپـیشـاندانه‌کانه‌وه‌ که‌سێـک کوژراوه‌، به‌ڵام ئه‌مڕۆ خۆپـیشـاندانێـک سـازکراوه‌ و توندوتیژی لێـنه‌که‌وتۆته‌وه‌ و ئێسـتا باردودۆخی شاره‌که‌ هێوربووه‌ته‌وه‌.

له‌ هه‌ڵه‌بجه‌ش به‌هۆی کوژرانی پـۆلیسێـک له‌ توندوتیژیـیه‌کانی خۆپـیشـاندانه‌که‌ی ڕۆژی چوارشه‌ممه‌دا، خۆپـیشـانده‌ران بڕیاریان دابوو بۆ ماوه‌ی دوو هه‌تا سێ ڕۆژ خۆپتیشـاندان نه‌که‌ن، به‌ڵام ئه‌مڕۆ ڕایانگه‌یاند که‌وا له‌مه‌ودوا ده‌سـت به‌ خۆپـیشـاندان ده‌که‌نه‌وه‌ و هه‌وڵ ده‌ده‌ن داواکاریـیه‌کانیان بگه‌یه‌نـنه‌ لایه‌نی مه‌به‌ست.

ده‌توانن گوێبیسـتی ده‌قی ڕاپـۆرته‌كه‌ بن له‌ ڕێـگه‌ی كلیـكـكردنی ئه‌و فایله‌ ده‌نـگیـیانه‌ی سه‌ره‌وه‌ی ده‌سته‌ چه‌پ‌، ماوه‌كه‌ی 5:21 خوله‌كه‌.

بابه‌تی په‌یوه‌ندیدار

XS
SM
MD
LG