Accessibility links

قایمقامی هه‌ڵه‌بجه‌ ده‌ڵێت وێنه‌ی ئه‌وانه‌ی له‌ خۆپـیشـاندانه‌که‌دا ته‌قه‌یان کردووه‌ گیراوه‌

  • Latif Nirwayi

قایمقامی هه‌ڵه‌بجه‌ ده‌ڵێت وێنه‌ی ئه‌وانه‌ی له‌ خۆپـیشـاندانه‌که‌دا ته‌قه‌یان کردووه‌ گیراوه‌

قایمقامی هه‌ڵه‌بجه‌ ده‌ڵێت وێنه‌ی ئه‌وانه‌ی له‌ خۆپـیشـاندانه‌که‌دا ته‌قه‌یان کردووه‌ گیراوه‌

له‌تیف نێروه‌یی په‌یامنێری ده‌نگی ئه‌مه‌ریکا له‌ سـلێمانی له‌ کاتژمێر 8:15 ی ئێواره‌ی ئه‌مڕۆ چوارشه‌ممه‌ به‌ کاتی سلێمانی ڕاپۆرتی ڕاسته‌وخۆی پـێشـکه‌شکرد سه‌باره‌ت به‌ خۆپـیشـاندانی شـاری هه‌ڵه‌بجه‌ و ڕه‌وشه‌که‌ به‌ گشـتی.

ده‌ڵێت به‌ پـێی سه‌رچاوه‌ ته‌ندروسـتیـیه‌کانی هه‌ڵه‌بجه‌ له‌ ئاکامی توندوتیژیـیه‌کانی خۆپـیشـاندانه‌که‌ی ئه‌مڕۆ چوارشه‌ممه‌ یه‌ک که‌س کوژراوه‌ و 4 که‌سی دیکه‌ بریندابوون. 2 له‌ برینداره‌کان پـۆلیسن و دووانه‌که‌ی تر هاوڵاتین.

هه‌ندێـک ماڵپه‌ڕ ئاماژه‌یان به‌وه‌ داوه‌ که‌وا ئه‌و پـۆلیسه‌ی کوژراوه‌ به‌ گولـله‌ی هێزه‌کانی پـۆلیس خۆیانه‌وه‌ بووه‌‌، به‌ڵام گۆران ئه‌دهه‌م قایمقامی قه‌زای هه‌ڵه‌بجه‌ ئه‌و هه‌اڵانه‌ی ڕه‌تکرده‌وه‌ و ڕایگه‌یاند ئه‌وه‌ ناحه‌قیـیه‌که‌ به‌رامبه‌ر به‌و پـۆلیسه‌ ده‌کرێت که‌ کوژراوه‌، چونکه‌ به‌پـێی قسه‌ی خۆی چه‌ند که‌سێـک به‌ ده‌مانچه‌وه‌ له‌ ناو خۆپـیشـانده‌ران بوون و وێنه‌کانیان گیراوه‌ که‌ ته‌قه‌ ده‌که‌ن. گوتووشیه‌تی لیژنه‌یه‌ک بۆ لێـکۆڵینه‌وه‌ له‌و ڕووداوه‌ پـێـکهێنراوه‌. ئێسـتا بارودۆخی هه‌ڵه‌بجه‌ ئارامه‌.

له‌ لایه‌کی دیکه‌وه‌ له‌ شـاری سلێمانی دکتۆر به‌رهه‌م سـاڵح سه‌رۆکی حکومه‌تی هه‌رێمی کوردسـتان له‌گه‌ڵ نوێنه‌رانی مامۆسـتایان و خوێندکاراندا کوبووه‌ته‌وه‌ تاوه‌کو له‌ نزیکه‌وه‌ گوێبیستی داخوازیـیه‌کانیان بێت. کۆبوونه‌وه‌که‌ چه‌ند کاتژمێرێـکی خایاند و له‌ سه‌ره‌تادا قایل نه‌ده‌بوون که‌ناڵه‌کانی ڕاگه‌یاندن ڕووماڵی کۆبوونه‌وه‌که‌ بکه‌ن، به‌ڵام پاشـان وه‌ها دیاربوو کۆبوونه‌وه‌که‌ ئه‌نجامێـکی دڵخۆشکه‌ری هه‌بووه‌. دکتۆر به‌رهه‌م ڕایگه‌یاند ئه‌وانه‌ی خۆپـیشـاندان ده‌که‌ن خه‌ڵکی ئه‌م شـاره‌ن و مافی خۆیانه‌ خۆپـیشـاندان بکه‌ن و ده‌بێت ڕێـگایان پـێبدرێت خۆپـیشـاندان بکه‌ن و گوێ له‌ داواکاریـیه‌کانیان بگرێت، له‌ به‌رامبه‌ردا مامۆسـتا هه‌ڤاڵ ئه‌بو به‌کر مامۆسـتای زانکۆی سلێمانی ئه‌ویش سه‌باره‌ت به‌ ئه‌نجامی کۆبوونه‌وه‌که‌ خۆشـحاڵی خۆی ده‌ربڕیوه‌. هه‌روه‌ها ڕایانگه‌یاند‌ که‌ له‌سه‌ر هه‌ندێـک خاڵ ڕێـکه‌وتوون به‌ تایبه‌تی ئاسایی‌کردنه‌وه‌ی بارودۆخه‌که‌ و هه‌وڵدان بۆ چاکسـازی و پـێـکهێنانی لیژنه‌یه‌ک بۆ چاودێریکردنی چۆنێتی چاکسـازیـیه‌کان. هه‌روه‌ها دکتۆر به‌رهه‌م ڕایگه‌یاندووه‌ هیچ گیراوێـک نه‌ماوه‌، ئه‌گه‌ر ماویشه‌ با ناوی ئه‌و که‌سـانه‌ی بۆ بنێرن هه‌تا خۆی به‌دواداچونیان بۆ بکات و ئازادبکرێن. بڕیاره‌ سبه‌ی پـێـنجشه‌ممه‌ سه‌رۆکی حکومه‌تی هه‌رێمی کوردسـتان له‌گه‌ڵ نوێنه‌رانی خۆپـیشــانده‌رانیش کۆبـبێته‌وه‌.

هه‌روه‌ها وه‌زیری خوێندنی باڵاش سه‌ردانی زانکۆی سلێمانی کردووه‌ و له‌وێ وته‌یه‌کی پـێشـکه‌شکرد و پـشـتگیری له‌ داواکانی خوێندکاران و قوتابیان کردووه‌ و گوتویه‌تی ئێمه‌ له‌گه‌ڵ ئه‌و داواکاریـیانه‌ی که‌ به‌ شێوازێـکی هێمنانه‌ و ئاشـتیانه‌ پـێشـکه‌ش ده‌کرێن.

ئه‌وه‌ی به‌دی ده‌کرێت لێپـرسـراوان ده‌یانه‌وێت خۆیان له‌و خه‌ڵـکه‌ نزیک بکه‌نه‌وه‌ که‌ داواکاریـیان هه‌یه‌ و له‌ هه‌مان کاتیشـدا پـشـتگیری له‌ داواکاریـیه‌کانیان ده‌که‌ن و داواش ده‌که‌ن پـێشـکه‌شکردنی ئه‌و داواکاریـیانه‌ به‌ شێوازێـکی هێمنانه‌ بێت، بۆیه‌ له‌وه‌ ده‌چێت ڕێڕه‌وی مه‌سه‌له‌که‌ به‌ره‌و هێوربوونه‌وه‌ بچێت.

ده‌توانن گوێبیسـتی ده‌قی ڕاپـۆرته‌كه‌ بن له‌ ڕێـگه‌ی كلیـكـكردنی ئه‌و فایله‌ ده‌نـگیـیانه‌ی سه‌ره‌وه‌ی ده‌سته‌ چه‌پ، ماوه‌كه‌ی 5:20 خوله‌كه‌.

بابه‌تی په‌یوه‌ندیدار

XS
SM
MD
LG