بەرەبەیانى ئەمڕۆ پـێنجشەممە هێزێكى تایبەتى ئەمەریكایى كە چەند فڕۆكەیەكی هەلیکۆپتەریان پێبووە، لە سەربازگەیەكى داعش لە گوندى مەهافیس ى رۆژئاواى حەویجە دابەزیون و پاش پێكدادانى كورت لەگەڵ چەکدارانی داعش سەربازگەكەیان كۆنترۆڵكردووە.
پیتەر کوک گوتەبێژی وەزراەتی بەرگری ئەمەریکا دەڵێت هێزی تایبەتی کوردی بە پاڵپشـتی هێزی تایبەتی ئەمەریکایی سەرپەرشتی ئۆپەراسیۆنەکەی کردووە و لە ئاکامدا 70 بارمتە ڕزگارکراون، لەوانە 20 کەسیان لە هێزە ئاسایشیـیەکان بوون. لەگەڵ ئەوەشدا ژمارەیەک چەکداری داعش کوژراون کە لە 10 چەکدار زیاترن و 5 چەکداری دیکەی داعش دەسـتگیرکراون، بەڵام سەربازێـکی هێزە تایبەتەکەی ئەمەریکا لە میانەی ئۆپەراسیۆنەکە گیانی لەدەسـتداوە و 4 پـێشمەرگەی هێزە کوردیـیەکەش برینداربوون. گوتیشی 5 فڕۆکەی هەلیکۆپتەر لە ئۆپەراسیۆنەکە بەکارهاتوون.
لە لایەکی دیکەوە سەرچاوەیەكى باڵاى ئەمنى لە پارێزگاى كەركوک زانیارى وردى لەسەر ئۆپەراسیۆنى هێزە تایبەتە ئەمەریكیەكە بۆ دەنگى ئەمەریكا ئاشكرا كرد و ، وتى"هێزە ئەمەریكیەكە رۆیشتوونەتە سەر سەربازگەیەكى داعش ، كە گومان دەكرێت لەو جێگەیەدا بەرپرسى باڵاى داعش و زیندانى تێدا بووبێت."
سەرچاوەكە ئاماژەى بەوەشكرد تا ئێستا پۆلیسى عێراقى و هێزى پێشمەرگە زانیاریان لە بارەى ئامانج و چۆنیەتى پرۆسە سەربازیەكەى ئەمەریكا نیە ، وتیشى"بەپێى زانیاریەكانى ئێمە پاش پێكدادانێكى كورت ، دەست بەسەر جێگەكەدا گیراوە و چەند بەرپرسێكى داعشیش دەستگیركراون."
هیچكام لە پۆلیسى عێراقى و هێزى پێشمەرگەش ئاگادارى ئەو پرۆسە سەربازیەى هێزە تایبەتەكەى ئەمەریكا نین، كە بەرەبەیانى ئەمرۆ لە رۆژئاواى حەویجە ئەنجامدراوە و بەپێى سەرچاوەكان سەربازێكى ئەمەریكى گیانى لەدەستداوە و 70 بارمتەش رزگار كراون.
عەمید سەرحەد قادر بەرێوەبەرى پۆلیسى قەزاو ناحیەكانى كەركوك، ئاماژەى بەوەكرد چەند فرۆكەیەكى ئەمەریكى ئۆپەراسیۆنێكیان ئەنجامداوە و چوونەتە سەر جێگەیەكى ستراتیژى داعش و وتى"بەڵام ئێمە وەكو پۆلیسى عێراق نازانین ئەو بارمتانەى هێزە ئەمەریكیەكە رزگارى كردوون ژمارەیان چەند كەس بووە و لەچى نەتەوەیەك بوون."
هاوكات جەبارە یاوەر ئەمیندارى گشتى وەزارەتى پێشمەرگەى حكومەتى هەرێم ، ئاشكرایكرد ئەوان وەكو وەزارەتى پێشمەرگە بەهیچ شێوەیەك ئاگایان لە ئۆپەراسیۆنەكەى هێزە ئەمریكیەكان نیە، وتى"ئێمە 5 خولەك جارێك قسە لەگەڵ ژوورى ئۆپەراسیۆن دا دەكەین ، لەو هەزار كیلۆمەترەى كە بەدەست پێشمەرگەوەیە هیچ شتێك رووینەداوە."
پێشتر هێزەكانى ئەمەریكا چەند جارێك لە سوریا ئۆپەراسیۆنى تایبەتیان بە مەبەستى دەستگیركردنى بەرپرسانى داعش ئەنجامداوە.