Accessibility links

بەشێک لە بەرپرس و چەکدارانى داعش بۆ خۆ ڕادەستکردن وەفدیان ناردووەتە لاى پێشمەرگە


بەرپرسانى پێشمەرگە و هێزە ئەمنیەکان لە کەرکوک ، دەڵێن بەشێک لە چەکدارەکانى داعش خەڵکیان ناردووەتە لاى پێشمەرگە و دەیانەوێت خۆیان رادەست بکەن ، هەروەک پلانێکى ئەو رێکخراوەش ئاشکرادەکەن کە خۆخزاندنە نێو خەڵکە.

لیوا محەمەد قادر فەرماندەى پێمشمەرگە لە باشورى کەرکوک ، بە دەنگى ئەمەریکاى راگەیاند"چەند سەرکردەیەکى داعش خەڵکیان ناردووەتە لامان و دەیانەوێت خۆیان رادەستى پێشمەرگە بکەن ، بەو مەرجەى نەکوژرێن."

وتیشى"داعشەکان بە زیندانى کردن و هەموو شت رازین و تەنها مەرجیان پاراستنى ژیانیانە ، منیش بەرپرسە باڵاکانى پێشمەرگەم ئاگادار کردووەتەوە."

هەوڵى ئەو چەکدارانەى داعش بۆ خۆرادەستکردنى پێشمەرگە، لەکاتێکدایە داعش لەڕووى سەربازى و ئابورى و کۆمەڵایەتیەوە کەوتووەتە دۆخێکى خراپ و ، دانیشتوانى حەویجە بە کۆمەڵ هەڵدێن.

عەمید کاوە غەریب فەرماندەى پۆلیس لە باشورى کەرکوک، پلانێکى نوێى داعشى بۆ دەنگى ئەمەریکا ئاشکراکرد و ئاماژەى بەوەکرد داعش سوپایەکى خزمەتگوزارى دروستکردووە کە ئەم سوپایە ئیشیان بانگەشە کردنە بۆ داعش لەنێو مزگەوت و شاروشارۆچکەکان.

نابراو وتى"پێکهێنانى سوپاى خزمەتگوزارى داعش پێشتر ئیشى لەسەر کردووە و ، تەنانەت ئەو خەڵکە بیانیانەى لەئەمەریکاو وڵاتانى ترەوە دێن و دەبنە داعش لەسەر دەستى ئەم سوپایەیە ئامادە دەکرێن."

هەوڵەکانى بەشێک لەچەکدارەکانى داعش بۆ خۆ رادەستکردن و پلانى خۆخزاندنە نێو خەڵکى ، لەکاتێکدایە داعش بەشێکى زۆر لەشارە گەورەکانى لەدەستداوە و بەپێى وتەى بەرپرسانى ئەمنى پلانى داهاتووى ئەو رێکخراوە شەڕى پارتیزانیە.

XS
SM
MD
LG