Accessibility links

که‌مال كه‌ركوكی: ئه‌و چه‌كدارانه‌ی داعش كه‌ هێرشیان كرده‌ سه‌ر پێشمه‌رگه‌ عه‌ره‌بی حه‌ویجه‌ن


شه‌وی شه‌ممه‌ داعش له‌ میحوه‌ری رۆژئاوای كه‌ركوک هێرشێكی فراوانی بۆ سه‌ر سه‌نگه‌ره‌كانی پێشمه‌رگه‌ ده‌ستپێكرد ، به‌ڵام دوای دوو كاتژمێر شه‌ڕكردن هێرشه‌كه‌ی داعش تێكشكێنرا.

كه‌مال كه‌ركوكی به‌رپرسی میحوه‌ری رۆژئاوای كه‌ركوكی پێشمه‌رگه‌، به‌ده‌نگی ئه‌مه‌ریكای راگه‌یاند"داعش به‌درێژایی میحوه‌ره‌كانی پێشمه‌رگه‌ جم و جۆڵی هه‌یه‌ و ده‌یه‌وێت له‌رێگه‌ی هێرش كردنه‌وه‌ زیان به‌پێشمه‌رگه‌ بگه‌یه‌نێت. "

وتیشی"شه‌وی رابردوو داعش له‌ 3 قۆڵه‌وه‌ هێرشی كردووه‌ته‌ سه‌ر پێشمه‌رگه‌ ، به‌ڵام پێشمه‌رگه‌ به‌رپه‌رچی هێرشه‌كانی داعشی دایه‌وه‌. "

له‌هێرشه‌كه‌ی داعش دا گرێده‌ر و شۆفڵی درع له‌لایه‌ن پێشمه‌رگه‌وه‌ سوتێنراوه‌ ، كه‌ به‌پێی وته‌ی به‌رپرسانی پێشمه‌رگه‌ به‌كارهێنانی ئه‌و كه‌ره‌ستانه‌ بۆ بڕینی سه‌نگه‌ره‌كان هێنراون.

كه‌مال كه‌ركوكی، ئاماژه‌ی به‌وه‌كرد سه‌رجه‌م ئه‌و چه‌كدارانه‌ی داعش كه‌ له‌هێرشه‌كه‌دا به‌شداربوون ، چه‌كداری عه‌ره‌بی سونه‌ی خه‌ڵكی حه‌ویجه‌ و ده‌وروبه‌رین، وتی"هه‌موو خه‌ڵكی حه‌ویجه‌ له‌گه‌ڵ داعشدایه‌ ، وه‌كو چۆن له‌سه‌رده‌می به‌عس دا زۆربه‌یان به‌عسی بوون. "

هێرشه‌كه‌ی شه‌وی رابردووی داعش له‌كاتێكدایه‌، ئه‌مرۆ پێشمه‌رگه‌ له‌ میحوه‌ری خازره‌وه‌ هێرشی بۆ سه‌ر داعش ده‌ستپێكردووه‌ و به‌وته‌ی به‌رپرسانی پێشمه‌رگه‌ پێشره‌ویان كردووه‌.

XS
SM
MD
LG