Accessibility links

شارەزایەكى ئوسترالى بوارى مین هەڵگرتنەوە لە باشوری کەرکوک گیانى لەدەستدا


بەهۆى تەقینەوەى بۆمبێكى چێنراوەوە پێیدا لە باشورى كەركوك ، ئەمڕۆ سێشەممە ئەندامێكى تیمى رێكخراوى (Fsd) swiss foundation for mine Action بە ناوى مارك كە شارەزایەكى ئوسترالى بوارى هەڵگرتنەوەى مینە گیانى لەدەستدا.

عەقید روكن تاریق ئەحمەد جێگرى فەرماندەى لیواى 9 ى هێزى پێشمەرگە لە باشورى كەركوك، بە دەنگى ئەمەریكاى راگەیاند"مارك ماوەیەكە لەگەڵ رێكخراوى (ئێف ئێس دى)دا هاتووەتە باشورى كەركوک بۆ پوچەڵكردنەوەى ئەو بۆمبانەى كە داعش لە ناوچەكەدا چاندوونى، بەڵام ئەمڕۆ بەهۆى تەقینەوەى بۆمب پێیدا گیانى لەدەستدا."

ڕێكخراوى ( ئێف ئێس دى ) ڕێكخراوێكى سویسریە و بارەگاكەى لە جنێڤە، ئەم ڕێكخراوە لە بوارى هەڵگرتنەوەى لوغم و پوچەڵكردنەوەى میندا كاردەكات.

ئاسۆ مەحمود بەڕێوەبەرى چالاكیەكانى ڕێكخراوى (ئێف ئێس دى) لە باشورى كەركوک، بە دەنگى ئەمەریكاى ڕاگەیاند"لەئێستادا تەرمى مارك دەبەینە پزیشكى دادوەرى كەركوک و لەوێشەوە تەرمەكەى بۆ هەولێر دەگوێزرێتەوە، پاشان لە ڕێگەى فڕۆكەخانەوە ڕەوانەى وڵاتى خۆى دەكرێتەوە كە ئوسترالیایە."

هاوكات ئەمڕۆ بەڕێوەبەرى پۆلیسى قەزاو ناحیەكانى كەركوک، دەستگیركردنى 10 ئەندام و لایەنگیرى داعشى لە سنوورى كەركوک راگەیاند، كە بەپێى وتەى بەرپرسانى پۆلیس دەستیان لە تەقاندنەوەى بۆریە نەوتى خەبازەى رۆژئاواى كەركوكدا هەبووە.

XS
SM
MD
LG