Accessibility links

ئاستی تیشکدانه‌وه‌ی ناوکی له‌ فوکوشیمای ژاپـۆن زیادیکردووه‌

  • Martyn Williams

ئاستی تیشکدانه‌وه‌ی ناوکی له‌ فوکوشیمای ژاپـۆن زیادیکردووه‌

ئاستی تیشکدانه‌وه‌ی ناوکی له‌ فوکوشیمای ژاپـۆن زیادیکردووه‌

کاربه‌ده‌ستان له‌ ژاپۆن ده‌ڵێن ئاستی تیشکدانه‌وه‌ی ناوکی له‌ ناو ئاوی به‌شێکی کارگه‌ی ناوکی فوکوشیما زۆر به‌رزبووه‌ته‌وه‌. بۆ ڕۆژی یه‌کشه‌ممه‌ش کرێـکاره‌کان‌ به‌رده‌وامبوون له‌ کاره‌کانیان بۆ چاکـکردنه‌وه‌ی سیستمی په‌مپی ئاو هه‌ڵـدانی کارگه‌که‌‌ که‌ بۆ سـاردکردنه‌وه‌ی ڕیاکته‌ره‌کان به‌کارده‌هێنرێت.

په‌یامنێری ده‌نگی ئه‌مه‌ریکا مارتن ولیه‌مز له‌ تۆکیۆوه‌ ڕاپـۆرتی له‌و باره‌یه‌وه‌ ناردووه‌ و هاوکارمان به‌ڵێن سـاڵح به‌ کوردی ئاماده‌ی کردووه‌.

ئاستی تیشـکدانه‌وه‌ له‌ ڕیاکته‌ری ژماره‌ 2 ی کارگه‌ی ناوکی فوکوشیما 10 ملیۆن هێند زیاتره‌ له‌ باری ئاسایی، بێ له‌وه‌ش تیشـکدانه‌وه‌ له‌و ئاوه‌ی له‌ ژێرزه‌مینه‌که‌ی هه‌مان ڕیاکته‌ردایه‌ گه‌یشـتۆته‌ 134 .

کاربه‌ده‌سـتانی حکومه‌ت و کارگێڕانی کارگه‌ ناوکیـیه‌که‌ ده‌ڵێن دڵنیا نین له‌وه‌ی سه‌رچاوه‌ی ئه‌و تیشـکدانه‌وانه‌ له‌ کوێوه‌یه‌، ته‌نها ئه‌وه‌نده‌ نه‌بێت ده‌ڵێن ده‌شێت له‌ ڕیاکته‌ره‌که‌یه‌وه‌ بێت. له‌ ئێسـتاشدا هه‌روادێت و ڕێژه‌ی پـیسبوونی ئاوی ئه‌و ده‌ریایه‌ی له‌ چوارده‌وری کارگه‌ ناوکیـیه‌که‌یه‌ زیاد ده‌کات.

هێدیهیکۆ نیشیـیاما جێـگری به‌ڕێوه‌به‌ری گشـتی ده‌زگای پاراسـتنی ناوکی و پـیشه‌سـازی‌ له‌ ژاپـۆن ده‌ڵێت ئاسـتی تیشـکدانه‌وه‌کان له‌ ناو ئاوی ده‌ریادا 1850 جار زیاتره‌ له‌و سـنووره‌ یاسایـیه‌ی که‌ هه‌یه‌ و ڕۆژی پـێشـتر 1250 بوو، ده‌شڵێت ئه‌م زیادبوونه‌ش مه‌ترسیـیه‌کی ده‌ستبه‌جێی له‌سه‌ر ته‌ندروسـتی مرۆڤ دروسـت ناکات.

ڕۆژی یه‌کشه‌ممه‌ش کارکردن له‌و کارگه‌ ناوکیـیه‌دا به‌رده‌وام بوو بۆ په‌ره‌پـێدانی سیسـتیمی ئاوی کارگه‌که‌ که‌ یارمه‌تیده‌ره‌ بۆ هێشـتنه‌وه‌ی ڕیاکته‌ره‌که‌ و لولـله‌ ناوکیـیه‌کانیش به‌ ساردی.

هێشـتاش نیگه‌رانی هه‌ن سه‌باره‌ت به‌وه‌ی به‌رده‌وامی به‌کارهێنانی ئاوی ده‌ریا ده‌شێت زیان له‌ بۆری و ئه‌و که‌ره‌سـتانه‌ بدات که‌ بۆ سـارکردنه‌وه‌ی ڕیاکته‌ره‌کان به‌کارده‌هێنرێن.

وا پـێده‌چێت کێشه‌ی کارگه‌ ناوکیـیه‌که‌ی فوکوشیما ڕووه‌و چاره‌سه‌رکردن بڕوات، هه‌رچه‌نده‌ کاربه‌ده‌سـتانی حکومه‌ت ئاگاهی ده‌ده‌ن چاره‌سه‌رکردنه‌کان ده‌شێت کاتێـکی زۆر زیاتر بخایه‌نێت تا به‌ ته‌واوی کۆنتڕۆڵ ده‌کرێن.

دوو هه‌فته‌ زیاتر تێپه‌ڕیوه‌ له‌ پاش ئه‌و بومه‌له‌رزه‌ و سوونامیـیه‌ گه‌وره‌یه‌ی به‌شـێـکی زۆری که‌ناری ڕۆژهه‌ڵاتی ژاپـۆنی وێرانکرد. پـۆلیسی ژاپـۆنی ده‌ڵێت هه‌تا ئێسـتا مردنی نزیکه‌ی 10500 که‌س پـشـتڕاست کراوه‌ته‌وه‌ و هه‌روه‌هاش 16600 که‌سیش بێ سه‌روشوێنن.

بابه‌تی په‌یوه‌ندیدار

XS
SM
MD
LG