بەرپرسانى شارى کەرکوک ، وەڵامى راپۆرتێکى رێکخراوى چاودێرى مافەکانى مرۆڤ کە هێزە کوردیەکانى بەدەرکردنى ئاوارە تورکمانەکان لەو شارە تۆمەتبارکردبوو ، دەدەنەوە و دەڵێن ئاوارە لەکەرکوک دەرنەکراوە.
جوان حەسەن سەرۆکى لیژنەى مافى مرۆڤ لە ئەنجومەنى پارێزگاى کەرکوک ، بەدەنگى ئەمەریکاى راگەیاند"هیچ ئاوارەیەک لەکەرکوک دەرنەکراوە ، جگە لەو ئاوارانە نەبێت کە خەڵکى ناوچە ئازاد کراوەکانن و پێیانوتراوە بگەرێنەوە ناوچەکانیان."
سەرۆکى لیژنەى مافى مرۆڤ، رونیکردەوە بەپێى بریارى ئەنجومەنى وەزیران هەر ناوچەیەک ئازاد بکرێت ، دەبێت دانیشتوانەکەى بگەرێنەوە سەر ماڵ و حاڵیان ، وتى"ئەو جۆرە راپۆرتانە مەبەستى سیاسیان لەپشتەوەیە ، تا وا نیشانى بدەن کورد لەکەرکوک زوڵم دەکات."
رێکخراوى چاودێرى مافەکانى مرۆڤ لە راپۆرتێکدا کە رۆژى یەکشەمە بڵاویکردوەتەوە ، ئاماژەى بەوەکردووە دەسەڵاتدارانى کورد لەکەرکوک ئاوارە تورکمانە سونەکان ناچار دەکەن شارەکە چۆڵ بکەن.
ئازاد جەبارى سەرۆکى لیژنەى ئەمنى لەئەنجومەنى پارێزگاى کەرکوک، ئاماژەى بەوەکرد ئەوان جیاکاریان لەنێوان ئاوارەکاندا نەکردووە ، وتى"هیچ کەسێک ئاوارەى لەکەرکوک دەرنەکردووە."
پێشتریش رێکخراى چاودێرى مافەکانى مرۆڤ چەندین راپۆرتى ترى لەبارەى دۆخى ناوچە کێشە لەسەرەکان بڵاو کردوەتەوە و هێزە عێراقیە جیاجیاکانى بە پێشێلکردنى مافەکانى مرۆڤ تۆمەتبار کردووە.
