Accessibility links

فەرماندەیەکى پـێشمەرگە: هاوپەیمانان چاویان لەسەر دەوروبەرى کەرکوکە


فڕۆکەکانى هاوپەیمانان بۆردومانى چەکدارەکانى داعشیان لە دەوروبەرى قەزاى حەویجەى ڕۆژئاواى کەرکوک چڕتر کردووەتەوە و بەپێى وتەى بەرپرسانى پێشمەرگە، ئەمڕۆ چوارشەمە 5 بارەگاى داعش لەلایەن فڕۆکەکانەوە کراونەتە ئامانج.

عەقید باپیر محەمەد فەرماندەى پێشمەرگە لە ڕۆژئاواى کەرکوک، بە دەنگى ئەمەریکاى راگەیاند"هەرکات داعش چەکدار کۆبکاتەوە فڕۆکەکانى هاوپەیمانان لێـیان دەدەن."

بەپێى وتەى بەرپرسانى پـێشمەرگە، بەهۆى بۆردومانى فڕۆکەکانى هاوپەیمانان پێنج بارەگاى داعش لە خۆرئاواى کەرکوک خاپورکراون ، بۆردومانەکانیش لەو کاتەدا بووە کە داعش هێزى چەکدار و ئۆتۆمبێلى بۆمبڕێژکراوى ئامادەکردووە و گومانى ئەوەکراوە کە ویستبێتیان پەلامارى پێشمەرگە بدەن.

شوان حەمەغەریب فەرماندەى لیواى پێشمەرگە لە ڕۆژئاواى کەرکوک، بە دەنگى ئەمەریکاى راگەیاند"لە شەنگالەوە تا مەخمور سوپاى عێراق کەوتوونەتە نێوان سەنگەرەکانى پێشمەرگە و داعشەوە ، بۆیە هاوپەیمانان لەو ناوچانە کەمتر داعش بۆردومان دەکەن."

وتیشى"لەوەتەى ئەرکى هێزەکانى هاوپەیمانان لەشەنگال و مەخمور کەمتر بووەتەوە ، فڕۆکەکانیان زیاتر سەرقاڵن بە دەوروبەرى کەرکوکەوە و لە حاڵەتى ڕووداوى نەخوازراودا داعش بۆردومان دەکەن."

لە ماوەى دوو ساڵى رابردوودا فڕۆکەکانى هاوپەیمانان بەدەیان بارەگاى داعشیان لەدەوروبەرى کەرکوک بۆردومانکردووە ، بۆردومانەکانیش لەو کاتانەدا بووە کە داعش جموجۆڵى لە ناوچەکەدا هەبووە.

XS
SM
MD
LG