شەوى رابردوو ژمارەیەک چەكدارى داعش بە جلوبەرگرى سەربازیەوە هەڵیانكوتایە سەر چەند گوندێكى سنورى زنجیرە چیاى حەمرین لە پارێزگاى دیالە و ، باوكێک و دوو كوڕ و خاڵێكیان گولـلەباران كرد.
محەمەد عومەر بەرپرسى كۆمیتەى قەرەتەپەى یەكێتى، بە دەنگى ئەمەریكاى راگەیاند"ئەو 4 كەسەى كە داعش گوللەبارانى كردوون عەرەبى سونەن و یەكێكیان زاناى ئاینیە، هۆكارى گولـلەبارانكردنیشیان نزیكایەتیان بووە لەكورد."
بە وتەى بەرپرسەكەى یەكێتى، ئەو چەكدارانەى داعش كە چوونەتە سەر گوندەكانى حەمرین لە زنجیرە چیاى حەمرینەوە هاتبوون و بەشێكیان روومەتیان هەڵپێچابووە.
محەمەد عومەر ، ئاماژەى بەوەشكرد لەسەر كوژرانى ئەو 4 كەسە لەلایەن داعشەوە هێزە ئەمنیەكانیان 3 كەسیان دەستگیركردووە و بڕیارى دەستگیركردن بۆ ژمارەیەک تۆمەتبارى تر دەرچووە.
پێشتر دەنگى ئەمەریكاى بڵاویكردەوە، كە هێزەكانى داعش گەڕاونەتەوە بۆ نێو زۆنگاوەكانى حەمرین و فێرگەى سەربازیان لەو ناوچەیە داناوە.